Burmami akerliussutsimik takutitsineq sakkortusiartorpoq
Myanmar-imi, siornatigut Burma-mik ateqaraluartumi, sakkutuunut naalakkersunut akerliussutsimik takutitseqattaarnerit sakkortusiartorput. Ullumi inuit 100.000-it missaaniittut akerliussutsimik takutitseqataapput, ukiuni 20-ni aatsaat taamak amerlatigisut akerliussutsimik takutitseqataallutik, politikkimullu tunngajartuinnalerlutik. Aqqusinersuaq kilometerip aappaata affaatut takitigisoq, biilinik sanileriinnik arfineq pingasunik ingerlavigineqarsinnaasoq inunnik ulikkaarsimavoq.
Akit qaffariartuinnarneri akerliussutsimik takutitseqattaarnernut pissutaaqqaaraluartut, maannakkut naalakkersuinerup tungaatigut iluarsaaqqiinissamik piumasaqarnermut saakkiartuaarput, kiisalu Aung Sang Su Kyi-mut tunngatinneqariartuinnarlutik. Akerliussutsimik takutitsisut Aung Sang Su Kyi-mik tapersersuinertik takutinniarlugu ullumi illuatungiliuttut qullersaqarfiat saneqquppaat, sapaatip akunnerata naanerani Aung Sang Su Kyi-p angerlarsimaffia saneqqutereeraat ippassaq saneqquteqqiniaraluaramikku naalakkersuisuniit akornusersorneqarput. Aallaqqaammut Budhistit mattuttut kisimik akerliussutsimik takutitseqattaaraluartut maannakkut inuppassuit allat tapersersuinertsik takutiniarpaat, ullumilu angallattut erfalasuusarujussuit akerliunerminnik allattuiffigisimasaat politiit alittorniapallaqattaarpaat. Burmami pissutsinik ilisimasaqarluartoq, Michael Gravers, Århusip Universitetianeersoq, oqarpoq naalakkersuisut isummatik paatilersimagunaraat, mattuttut akerliussutsimik takutiteqattaalermata naalakkersuisut, innuttatik Budhistiulluartuummata, akornusersorniarsimanngilaat. Imaassinnaavorli naalakersuisut akerliussutsimik takutitsisut unitsinniarnissaannut pissutissaminnik utaqqiinnartut, soorlu inuit mattuttuunngitsut aqqusinernik assersuilissangaluarpata, illunilluunniit tiguaasalissangaluarpata. Burmap saniliani Kinami killeqarfiup eqqaani eqqissivilliortunik takorusunngeqaat, silarsuarmilu nunanit allanit, naalakkeruisunut peqqarniitsunut tapersersuisutut tusaamaneqalernissartsik aarlerigalugu.
