Bulgariamiut niviarsiat nakorsarlu palæstinamiu Sofiamut anngupput

Timmisartoq sygeplejerskinik bulgariamiunik tallimanik nakorsamillu palæstinamiumik, bulgariamiusut passilimmik, ataatsimik issimasoqarluni Bulgariap illoqarfiisa pingaarnersaannut, Sofiamut, tasamani nalunaaqutaq malillugu ulloqeqqata siorna mippoq.

Inuit taakku arfinillit Libyami 1999-imili parnaarussaapput, meeqqanik hornorujunik arlalinnik HIV-p uumasuaraanik tunillaasimasutut pisuutinneqarlutik.

Bulgariamiut taakku arfinillit Frankrigimi præsidentip timmisartua atorlugu Bulgarialiaanneqarput, nuimasunillu ilaaqateqarput, ilaaqatigigamikkik Frankrigimi præsidentip nulia, Cecilia Sarkozy, aamma EU-mi nunanut allanut tunngassuteqartunut ataatsimiititami ilaasortaq, tassa kommissæri, Benita Ferrero-Waldner. Parnaarussat aniguisinneqarnissaat isumaqatigiinniutigiartorlugu taakku Libyap illoqarfiisa pingaarnersaanni, Tripolimiissimapput.

Peqqinnissaqarfimmi sulisut taakku namminneq pinerluuteqannginnerarput, meeqqallu HIV-p uumasuaraanik tunillatsissimanerannut napparsimmavimmi meeqqat uninngavianni eqqiluisaannginermik peqquteqarsimassangatillugu.

Parnaarussat aniguisitaanerisa kinguneraa, meeqqat tunillatsissimasut katsorsarneqarnissaat, kiisalu Libyami illoqarfiit ilaanni, Benghazimi, napparsimmaviup nutarterneqarnissaa, Europami nunat akuerimmassuk. Meeqqat tassani napparsimmavimmi 1990-ikkunni tunillatsipput. Libyamut attaveqarnerup pitsanngorsarneqarnissaa EU-p aamma akuersaarpaa, Libyallu suleqatigiinnermik taasagaata, killilersugaanngitsumik niuernermik ilaqartup, siuarsarneqarnissaa aamma akuersaarlugu.