Bulgariamiu Isertorluni ilaasoq

Bulgariamiu, Sverigimut nuunnerusoq Canadamiut kilisaataanni isertorluni ilaasutut tallimanngormat nalunaarutigineqarpoq. Tassa kilisaat aallartinnagu, kilisaatip naalagaata misissuitilluni angut kilisaatip qaluisa eqqaanut toqqorsimasoq nassaarimmagu.

Angut ullut qulit missaasa matuma siornagut Nuummut pisimavoq, takornariaannarunarluni. Nuummut pinermi kingornagut politiinut saaffiginnippoq, taskini, pigisaminik tamanik imalik tillitaasimanerarlugu, Nuummi politiineersoq John Thorsen oqarpoq.

- Taskini tillitaq pillugu paasissutissiissutigisai erseqqarloqaat, sapaatip akunneratalu siuliani taskini pillugu politiinut saaffiginneqqimmat, politiit Sverigimut utertariaqarneranik ilisimatippaat, allaammi Sverigimut bilitsissaanik tunineqarluni, John Thorsen oqarpoq.

Tallimanngormat aallartussaagaluarpoq, aallariartoranili, taamalu ualikkut Canadamiut kilisaataani isertortutut ilaasutut paasineqarluni.

- Allatut ajornaqimmat ulluni unnuanilu pingasuni tigummisariaqarsimavarput, nutaamik bilitsisissullugu massakkullu aallareerpoq, Nuup politiiviniit John Thorsen oqarpoq.

- Sooq Kalaallit Nunaaliarsimanersoq iluamik paasinaviarunanngilarput, tassami tamanna pillugu annerusumik oqaaseqarusunngimmat, taamaattorli Kalaallit Nunaat aqqusaarlugu Canadamut USA-mulluunniit ingerlariaqqinniarsimagaluartoq ilimagisinnaavarput, John Thorsen naggasiivoq.