Nuummi tikeraaq Buddhisti ukiuni 21-ni qinuniartoq

- Qiianarpoq, siallerpoq anorlerlunilu. Taamaattumik qannartara tusarnaarluaqqissaartariaqarpara.

Kinamiu Rudolph Xiaodong Nie Canadami najugalik oqarpoq. Taanna Pekingip ilisimatusarfiani inatsisilerituutut ilinniagaqarpoq. Buddhismemik upperisaqarpoq inuaqatigiit pilluarnerulernissaanik kissaateqarluni.

Inuit pilluarnissaannik qinnuppakka, inuiattullu pitsaanerulernissarput pillugu.

Rudolph Xiaodong Niep oqarnera naapertorlugu, nunarsuarmi innuttaasut oqartussaaqataanermut, aningaasarsiornermut teknologiimullu siuariartornertik pikkoriffigaat. Taassumali inuit pitsaanerusumik inuuneqarnissaat angorusutaraa.

- Inuit immitsinnut pitsaanerusumik pisariaqarpugut.

Taassuma qinnussinera oqaluffimmi qinnussinermit allaanerulaassaaq. Nunarsuarmi Illoqarfiit 2124-t qinuffiginiarlugit taassuma siunertaraa. Illoqarfinni tikitamini tamatigut kilometerinik pingasunik ingerlaarluni 999-eriarluni qinusassaaq. Pilersaarutaa naapertorlugu ukiup ataatsip ingerlanerani illoqarfiit 100-t tikittassavai. Nunarsuarmi nunat illoqarfiisa pingaarnersaanni qinnussinissaa pilersaarutaammat nunarput aamma tikinneqarpoq. Taamatulli angalaneq akikinngimmat aningaasat suminngaaniit pissarsiarisimanerai apeqqutigaarput.

- Canadami akuulersitsiniarnermut siunnersortaasarpunga, ilaqutariillu pigisatsinnik suliffiuteqarluta. Ikinngutimma kammalaatimmalu angalanera naammassiniassagakku aamma aningaasaliiffigisarpaannga.

Nuummiinermini anorlerluni sialleraluaqisoq kangianeersoq pissarsilluarsimanerarpoq.

- Kalaallit Nunaanni misigissutsikkut pissarsilluarpunga. Kusanaqaaq inuillu inussiarnerlutik, kiffaanngissuseqarnarpoq. Neriuppunga kalaallit pilluarnerulissasut pitsanngornerullutillu. Kalaallit Nunaat siunissami ajunngitsumik kissaappara.

Nuummeereeruni Københavnimukassaaq taassumalu kingorna nunarsuarmi inunnik qinnussinermut ukiut 20-t tulliuttut angalalluni atussavai.