Brugsenip neqit salmonilaqarsinnaasut uterteqqugai
Danmarkimi inuit 19-it salmonillamik napparsimalersimammata Brugsenip puulukit nersussuaaqqallu akuleriissillugit igariaannanngorlugit aserortikkat uterteqquai.
Allattoq Kenneth Elkjær
marsip 16-at 2017 13:18
Tunisassiat aalajangersimasut Coopimeersut novembarip sisamaanut 2016-imut qaangiuffissalerneqarsimasut pineqarput. Taamaattumik qerititsivinniitsitsiguit Brugsenimut saaffiginnissaatit aningaasallu utertinneqarsinnaassapput. Brugseni KNR-imut taama ilisimatitsivoq.
Danmarkimi inuit 19-it salmonillamik napparsimalersimapput, inuussutissanullu aqutsisoqarfiup tunillaassuunneq Coopimit igariaannagassanngortillugu nioqqutissiamit, qerisumit, puulukit nersussuaaqqallu akuleriissillugit igariaannanngorlugit aserortikkameersuussangatippaat.
Tunillatsissimasunit 19-init inuit marluk napparsimangaatsiareersimasut toqusimapput.
Brugseni naapertorlugit pisisartuminnit napparsimangaatsialersimasunit tusagaqarsimanngillat.
