Brugsenimi tillinniat suli paasineqanngillat
Paasineqartorli tassatuaavoq aningaasat tillinneqartut siullermik oqaatigineqarnerannit ikinnerusut, taama nalunarput politiit Brugsenilu.
Aningaasat tillinneqartut siullermik nalunaarutigineqarput 337.000 koruuniusut aammalu Tusassit 40.000 koruunit nalinginut tillittoqarsimasoq.
- Aningaasat tillinneqarsimasut ikinnerugaatsiartut maanna paasivarput, Brugsenimi pisiniarfiup pisortaa, Jes Nyborg oqarpoq.
Jes Nyborgip oqaatigisinnaannginnerarpaa qasserpiaat tillinneqarsimanersut, tikissitseqqissaarnermili paasinarsisimavoq aningasat tillitat ikinneralaakasiusut.
Tusassilli tillitat nalunaarutigineqarnermissut amerlatigisut oqaatigaa.
- Tillinniariitsiarnerup kinguninngua paasivarput angut Brugsenip silataani Tusassinik tuniniaasoq, politiilli takkutinnginnerani taanna periarfeerussimavoq, Jes Nyborg oqarpoq.
Brugsenimi sulisut, 200-juusut, akornanni toqqissisimannginneq pisiniarfimmi sulisitsisunik aaqqinniarneqartoq oqaatigineqarpoq.
- Tillittup piniarfimmi pissutsinut ilisimasaqarsimanera sulisunut sunniuteqarsimavoq, ingammik tilliffimmi toqqaannartumik sulisunut, Jes Nyborg oqarpoq.
- Taamaattumik paasiniaanerup ingerlarnganik oqaluttuuttarpavut, nalunaarfigalugillu politiit paasiniaaneranni sulisut ikittunnguit kisimik oqaloqatigineqartarmata. Aamma oqaatigisinnaavara sulisut amerlanersaat tillinniarsimanngitsutut nalilerneqareermata, Jes Nyborg naggasiivoq, neriuutigalu paasiniaaneq qanittumi paasineqassasoq.