Brugsenimi ippassaq sulisut tamarmik Nuummukartitaapput

Allan Nielsenip pisut ima oqaluttuarai:

- Ajortoqarnera ullo'qeqqata kingorna ataatsip missarileraa paasiartulerparput, isersimasut quersorlutillu niaqorluarujussualermata. Sulisut ilaat aamma anersaartorniarnermikkut ajornartorsiulerput. Taakku ambulancemit aaneqarput. Pisiniarfik ingerlaannaq matunngilarput nalugatsigu susoqarnersoq. Inuillu amerlanerit inuummarluleriarmata matuarput, Allan Nielsen oqaluttuarpoq.

Isersimasut inuummarluutertik suminngaanneernersoq paasinngeqqaaraluarpaat, Brugsenilli ilassutaani natilersuisut peqqiilliortorujussuusut paasileramikku paasivaat serpalittaatigisaasa aalaa inuummarliortitsilersoq.

- Soorunami ernumaammeqaagut. Napparsimmavimmut attaveqarpugut, taakkulu oqartussat kalerrippaat qanoq iliornissarput paasinaatigalugu. Uagut piumaffigineqarpugut silaannarissarluassasugut eqqissisimassasugullu, oqarpoq.

Brugsenimi sulisut, sanaartortut pisiniallu eqqorneqarput.

- Serpalittaasoqarnerani pisiniarfitsinni isersimasimasut arlalialunnguupput.

Ippassaq sulisuusut tamarmik, uanga minillunga, unnuaq Nuummukaanneqarput, Allan Nielsen ilisimatitsivoq.

Maniitsumi Brugseni ullumi aqagulu matoqqatinneqassaaq. Sullivinnik Nakkutilliisoqarfimmeersoq Brugsen Maniitsumut ualeru pulaareeriarpat qanoq pisoqaqqissanersoq nalunarumaanngilaq.

- Kisianni assut misigissutsitigut eqqortinnarpoq, sulisukkami qanoq innersut ernummatigeqaara, Allan Nielsen naggasiivoq.

Brugsen Maniitsumi pisortaq aamma oqaluttuarpoq, sulisumi ilaat Nuummi Dronning Ingridip Napparsimmavissuanit anereersimalersut.