Brugseni aatsaat taama angusarissaartigisoq

Suliffeqarfiup kaaviiaartitai amerlisimapput peqatigisaanillu ingerlatsinermi aatsaat taama angusarissaartigaluni. Ukiumoortumik angusat akileraarutit ilanngaatigereerlugit 24 millionit koruunit, 2012-imi 10 millionit koruuniullutik.

Kalaallit Nunaanni Brugsenip siulersuisuini siulittaasup, Ib Lennert Olsenip angusat nuannaarutigai:

- Angusavut naammagisimaarluinnarpagut. Periusissiarput malipparput pitsanngorsaaniarluta angusassami toraagaqarluta suliaqarsimalluni. Toqqorsivimmiittuutinik aqutsineq aningaasartuutigisallu immikkut ukkarineqarput, tamannalu angusatsinnut pitsaasumik sunniuteqarpoq, Ib Lennert Olsen oqarpoq.

Brugsenip sulisuminik ineriartortitsineq 2014-imi annertunerusumik samminiaraa aamma nalunaarutigaa. Kalaallit Nunaanni Brugseni 13-inik pisiniarfiuteqarpoq ilaasortaminullu 38.000-isunut 2013-imi 8 millionit koruuninik agguagarsiassaqartitsisimalluni.

Aammattaaq Brugsenimut ilaasortat siornamut naleqqiullugit 1370-inik amerleriarsimapput.