Brugseni 7,5 millioninik agguagarsisitsivoq
Brugsenit nunatsinni 13-iusut ilaasortaat ukiumoortumik agguagarsiniarlutik siuleriissaarsuataarput.
Nuummi Brugsenimi ilaasortatut allattorsimasut 11.000-iupput taakkulu ilaat 100-t arlallit ullaaq matut nalunaaqutaq aqqanernut ammarmata isaapput. Nuummilu koruunit 4 millionit missaanniittut agguaanneqartussaasut, Nuummi Brugsenip pisortaa Finn Christiansen oqarpoq.
- Januaarip ulluisa 21-iat agguagarsiffigissallugu iluarunaqaaq. Juulli kingumut akisusimassaqisoq, juullilu sioqqullugu aningaasarsisimaneq qaammammik januaarimik tallisuusisitsisartoq pillugu inuit agguagarsinissartik qilanaarisaqaat, Finn Christiansen oqarpoq.
Nunatsinni tamarmi aningaasat katillugit koruunit 7,5 millionit ilaasortanut 28.000-inut ullumimiit agguaanneqarput.
Agguagarsiat qaammatini pingasuni aaneqarsinnaasarput, piffissarlu qaangiuppat aaneqarsimanngitsut aappaagumut tigusassanngortinneqartarput.
kalaallit Nunaanni Brugsenit pisiat nalingisa 2 procentiat ilaasortanut agguagarsisitsissutigisarpaat, nalingilu siornamut naleqqiullugit 1 millioni koruuninik amerlanerupput.