British Petroleum Alaskami ajornartorsiorpoq

Issittumi uuliamik tunisassiorneq, avatangiisimut aserujasuumut ulorianarsinnaavoq.

Uuliasiorfiit nunanit assigiinngitsuneersut kalaallit nunaanniinnerisa nalaanni, tuluit uuliasiorfiat British Petroleum, BP, Alaskami ajornartorsiorpoq.

Alaskap uuliamut ataatsimiitsitaliarsuaanit misissuisartut, uuliasiorfimmut pasilliutit misissuleruttorpaat. BP-mi sulisoq, kinaassutsiminik isertuussisoq, oqarsimavoq, BP-p uuliamut aqqutai erngartut. Associated Press taama allappoq.

Misissuisut uuliamik qillikkat sullui 57-it, Alaskap avannaani North Slope Borough-imiittut misissorpaat.

BP siullermiilinngilaq ajornartorsiorluni.

Ukioq manna siusinnerusukkut uuliap aqqutaa ataaseq manngertornilluni siggippoq.

Uuliasioqatigiiffillu taamani oqarpoq, kukkuneq allanik ilaqanngitsoq. Uuliasioqatigiiffiup misissuineq aallartittoq qujaruppaa.