Korea Avannarleq: Brintimik qaartartumik misileraalluta qaartitsivugut

Brintimit qaartartuliamik misileraalluni qaartitsisimanertik, Korea Avannarliup naalagaaffiata tv-qarfiata nalunaarutigaa.

Korea Avannarliup nalunaarutaa, Korea Kujallermi nutaarsiassaqartitsiviup Yonhapip nutsersimavaa saqqummiullugulu:

- Brintimit qaartartuliaq raketimut ilanngunneqarsinnaasumik iluatsittumik qaartitsisoqarsimavoq. Ilisimatuut Korea Avannarlermeersut brintimit qaartartumik misileraallutik qaartartitsipput, iluatsilluarporlu, Korea Avannarliup tv-qarfia nunanut tamalaanut taama nalunaaruteqarpoq.

AAMMA ATUARUK Korea avannarleq Japan qulaallugu rakettimik igeriussisoq

Atomimik qaartartut arfinilissaat ukioq manna taamaasilluni qaartinneqarpoq, brintimillu qaartartumik qaartitsisoqarsimanersoq suli uppernarsineqanngilaq. DR.dk taama allaaserisaqarpoq.

Korea Avannarlermit nunap sajunnera ullumi siusinnerusukkut maluginiarneqarpoq, brintimillu qaartartuliamik misileraalluni qaartitsisoqarsimanera kingorna nalunaarutigineqarluni.

Nunat assuarinnipput

Korea Kujalliup præsidentiata Moon Jae-inip Korea Avannarlermi misileraalluni qaartitsisoqarnera assuaraa, pisariaqassappallu akiniaasoqarsinnaanissaa ammaffigalugu, Naalagaaffiillu Peqatigiit Isumannaallisaaniaqatigiivisa Korea Avannarlermut immikkut sukannersumillu iliuuseqarnissaat piumasaralugu.

Korea Avannarliup misileraalluni qaartitsinera Kinamit aamma assuarineqarpoq. Korea Avannarlermut uuliamik nioqquteqarnerup killilersorneqalernissaa Japanimi naalakkersuisut piumasaraat.

AAMMA ATUARUK Korea Kujalliup sorsuttoqarnissaa aarleriginngikkaa

Korea Avannarliup pissusilersuutai, Naalagaaffiillu Peqatigiit aalajangersagaannik unioqqutitsisaqattaarnera iliuuseqarfigineqartariaqalersoq, Danmarkip nunamut allanut tunngasunut ministeriata Anders Samuelsenip piumasaraa.