Brigitte Bardot assuarinnippoq - Massakkut qimmit pillugit
Nunatsinni qimuttut pineqartarnerat, siornatigut Frankrigimi filmiliaritittartuusimasup Brigitte Bardotip maanna assuarilerpaa. Brigitte Bardot maanna Dronning Margrethemut naammagittaalliorluni allagaqarsimavoq, allakkamini Dronningip nunatsinnut akuliunnissaa piumasarisimagaa, aviisi Ekstra Bladet ullumi taama allaaserinnippoq.
Allattoq Louise M. Kleemann
septembarip 24-at 2008 08:06
Aviisimi allaaserisaq naapertorlugu Bardot ilaatigut ima allassimanerarneqarpoq:
"Aput aanniariaraangat naggueqatigiinni Inunni qimmit igitassatut isigineqalertarput (...) Pissutsit taamaattut annilaarnartut akuerineqarsinnaanngilluinnarput. Taamaattumik taamatut assuarnartumik, kanngunartumik naakkittaatsumillu pissusilersorneq akuliuffigeqqullugu maniguullunga qinnuigaakkit,” , Brigitte Bardot Dronngimut ilaatigut taama allappoq.
