Brasiliap præsidenterisimasaata Lulap eqqartuussaanera atorunnaartoq
Brasiliap præsidenterisimasaata, Luiz Inacio Lula da Silviap (Lulap), anngiortumik peqquserluttuliorsimasutut eqqartuussaanera eqqartuussiviit qullersaanni eqqartuussisup atorunnaarsippaa suliarlu eqqartuussivimmut utertillugu.
Tamanna eqqartuussiviup allagaataani nutaarsiassaqartitsivimmit Reutersimit aamma takuneqarsimasuni erserpoq.
Taama aalajangerneq præsidentiusimasup politikkimut uteqqissinnaatitaalerneranik assersuutigalugulu præsidentimut aappaagu qinigassanngorteqqissinnaanngorneranik kinguneqarpoq.
Lula Brasiliami 2003-mit 2011-mut præsidentiuvoq.
AAMMA ATUARUK Brasiliami præsidentiusimasoq peqquserluttuliortutut pasineqartoq
Taanna brasiliamiunit ingammik piitsunit suli nuannarineqarluarpoq.
Præsidentiusimasoq 75-inik ukiulik anngiortumik peqquserluttuliorsimasutut pasineqarluni 2018-imi sulianut arlalinnut tunngatillgu ukiuni 13-ini parnaarussassanngortitaareerluni 2019-ip naanerani iperagaavoq.
Lula maannamut suli pinngitsuunerartarpoq. Taanna illuni aasarsiortarfiusoq sanaartornermik suliffeqarfissuarmit iluarsartitsisimanini pillugu eqqartuussaavoq.
