Brasiliami parnaarussat 25-t ikuallagussaapput
Madrassit parnaarussat ilaannit ikuallatsinneqarmata Brasiliami parnaarussat ikinnerpaamik 25-t ajunaarput. Ikuallatsitsinermut pissutaasoq tassaavoq, parnaarussat akornanni inupiloqatigiit imminnut akaarivallaangitsut marluk pissaaneqarniunnerat, Brasiliami politiit taama ilisimatitsipput.
Parnaarussat ikuallatsitsinerat illoqarfimmi Ponte Novami, naalagaaffimmi Miñas Geraisimiittumi, pivoq.
Parnaarussat toqusut qimaasinnaasimanngillat, parnaarussivimmi unammillertitut akeqqaminnit isaaffigineqaramik madrassillu ikuallatsillugit.
Brasiliami parnaarussivinni atugassarititaasut ajortorujussuupput, akerariillu parnaarussiviit iluini tamatigut akersuuttarput.
Parnaarussivik Ponte Novamiittoq 87-inut inissaqartitsivoq, pisulli nalaani parnaarussat 187-iusimapput.