Brasilia aamma Sydafrika piareersimapput
Silaannarmik mingutsitsineq pillugu Bonnimi ataatsimeersuartoqarnerani isumaqatigiissummut pituttornissartik, CO2-mik silaannarmut aniatitsineq millisarniarlugu piareersimanertik, nunat angisuut marluk, tassa Brasiliap aamma Sydafrikap, oqaatigisimavaat.
Buship suleqataasalu ukioq ataaseq affarlu imaluunniit ukiut marluk silaannarmik mingutsitsineq eqqartuiffigisarpaat. Kisiannili tunngaviusumik isiginninnerat silaannaap allanngoriartorneranut tunngatillugu suli allannguuteqanngilaq. Washingtoni-mili naalakkersuisut uuliamik ikummatissaqarniarneq siunissami allamik taarserneqanngippat silaannarmik mingutsitsineq pillugu suliniutissaminnik eqqarsaatersuuteqanngikkallarput. Kiisalu ikummatissaqarniarneq qulakkeerniarlugu aammalu suliffissaqartitsiniarneq pillugu Bush naalakkersuisooqataalu silaannarmik mingutsitsineq pillugu suliniutissanik eqqarsaatersuuteqanngikka-llarput. Amerikamiorpassuilli isumaqarput Washingtonip silaannarmik mingutsitsineq pillugu suliniutai arriippallaartut. Taamaattumillu aamma USA-mi naalagaaffiit ataasiakkaat nammineq suliniutinik aallartitsisarput soorlu; California, Chicago aamma New York. Mingutsitsinaveersaarnissamilli oqaluttoqaleraangat, soorlu benzinamut akitsuusiinissamik biililluunniit mingutsitsisuunngitsut atorneqalernissaat eqqartorneqaleraangata, taava silaannarmik mingutsitsinnginnissamik suliniutit qaangiataaginnarneqalersarput.
-Demokratiniit præsidentinngortoqaraluarpat qularutigineqanngilaq silaannarmut mingutsitsinermut USA-p politikkia allannguuteqarumaartoq. Nunarsuaq tamaat eqqarsaatigalugu silaannarmut mingutsitsinnginnissamut USA aatsaa peqataarusussinnaassaaq Kina Indialu nunallu ineriartorfiusut suleqataaniarpata. Mingutsitsinnginnissamummi kisimi atsioqataassagaluaruni, aningaasarsiornikkut nunanit taakkunannga qaangerneqarsinnaanini USA-p annilaanngatigissavaa.
Silaannarmut mingutsitsineq pillugu Københavnimi ukiut marluk qaangiuppata ataatsimeersuartoqartussaavoq.
USA atsioqataanissaminut eqqarsaatersuuteqanngilaq, naak amerikamiut præsidentiata qanittukkut nassueru-tigereeraluaraa nunarsuup kissakkiartornera qularutis-saanngitsumik inuit pilersitarigaat.
