BP-p Skotlandip avataani qillerivini matunialerpaa
Iran qillerivimmik piginneqataavoq, maannalu nuna taanna nunanit killernit mattunneqaqqajaammat, BP nunat killiit Iranimi palasiunerit naalakkersuinerannut mattussinerannit eqqugaariaannaavoq. Taamaattumik BP-p qullersai qilleriviup siunissaa pillugu ippassaq ataatsimiipput, tassa EU-mi nunanut allanut ministerit Iranimiut nukissiuutinik ingerlatsinerannut sakkortunerusumik pissuseqalerniarlutik ippassaq isumaqatigiissutigereersullu.
Paasissutissat kingulliit najoqqutaralugit, Iranip maskiina atomip nukinganik atortussanngortitsivik akerleriissutaaqisoq uranimik atuiffigilerpaa, taamalu nukissiuutimik atomitortumik siullerpaamik aallartitsinissamut alloriarluni. Paasissutissat naalagaaffiup tv-qarfianeersuupput.
Iranimiut atomimik nukissiorfiliaannut Rusland ikummatissamik pilersuisuuvoq, tassanngaanniillu eqqagassanngortut aamma russinit isumagineqarniarput.
Nunat killiit pissaanilissuit USA siuttuliullugu isumaqatigiissutigaat, Iranip atomip nukinganik atuiniarnera pasinartoqartoq, Iranimiulli atomip nukinganik atuiniarnertik taamaallaat nukissiuutinut tunngasuusoq aalajangiusimavaat. Taamaattumik nunap taassuma uranimik atuiniarnini unitsikkusunngilaa, naak tamanna nunarsuarmiunit piumasarineqaraluartoq.
