BP-p pisortaa tunuassaaq
Tamanna Tony Haywardip uuliasioqatigiiffimmi BP-mi pisortap maanna nassuerutigaa.
Tassami taanna ullut arlaqanngitsut qaangiuppata tunuarniartoq Tuluit aviisianni Sunday Telegraphimi allaaserineqarpoq.
Piffissarlumi apeqqutaaginnalerpoq. Tassami Mexicop Kangerliumanersuani qillerivimmi ajutoornermut, apriilip 20-annili aallartittumut, Haywardip iliuusai sakkortuumik isornartorsiorneqartareermata.
Tuluit aviisianni allami, Sunday Times-imi allaaserineqarpoq, BP-p ukiup affaanut naatsorsuutiminik marlunngorpat saqqummiussitinnagu, Haywardip soraarniutini tunniunniaraa.
Tusatsiakkat tamakkua BP-mit oqaaseqarfigineqarusunngillat, oqaannarlutilli uuliasioqatigiiffiup Haywardimut tatiginninnera allannguuteqanngitsoq.