BP-p Issittumi qillerinissani 2016-mi aallartissavai

BP-p russillu uuliasiortitseqatigiiffiata Rosneftip Issittumi uuliasiorlutik qillereqatigiinnissaat ukiut tallimat qaangiuppata aallartissaaq, pilersaarutigaallu issittoqarfinni allani suleqatigiiinnertik annertusiniarlugu.
Allattoq Nukappiaaluk Hansen Magnussen
januaarip 18-at 2011 07:55

Tuluit uuliasioqatigiiffiata russit uuliasioqatigiiffiat milliardimik ataatsimik nalilimmik tallimanngormat isumaqatigiissuteqarfigaa. Rosneft Ruslandimi uuliasioqatigiiffiit annersaraat, ataatsimoorlutillu Karap imavissuani Issittumiittumi uuliasiorlutik qillereqatigiinnissamut isumaqatigiissusiorput.

- Pilersaarutigaarput qillerinerit 2016-mi aallartinniarlugit, Rosneftimi pisortap tullia, Peter O'Brien, russit nutaarsiassaqartitsiviannut RIA Novostimut oqarpoq.

Karap imavissuani 125.000 kvadratkilometerinik annertutigisumi uuliamik qillereqatigiinnissaat akuersissutigineqarpoq. Rosneftip ilimagaa, Karap imavissuani uuliamik nappartanik 36 milliardinik immiisinnaallutik, gassilu 10 billion kubikmeteri qallorsinnaallugu ilimagalugu.

Rosneft BP-lu pilersaaruteqarput suleqatigiinnertik annertusiniarlugu.

- Issittumi periarfissat misissorniarpavut, O'Brien nutaarsiassaqartitsivimmut Bloombergimut nalunaarpoq, aamma oqarluni uuliasiortut suleqatigiinnissaat nuannaarutigalugu.

Mexicop Kangerliumanersuani uuliamik ajutoortoqareersorlu BP isornartorsiorneqartaqaaq, Kalaallit Nunaannilu uuliamik misissuilluni qillerinissami akuersissummik ukioq kingulleq qinnuteqarniaraluarnini tunuartiinnarlugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq