BP nunatsinni uuliasiorniarunnaarpoq

Mexicop kangerliumarngani uuliasiorfiup ajutoornerata kingorna politikkikkut kingunipilorisinnaasai ernummatigalugit BP-p uuliasiornissamik pilersaarutini allat unitsikkat tuluit aviisiat The Guardian nittartakkamini ullumi allaaserisaqarpoq.

Uuliasiornissamik neqeroorfigineqaneqartunut ilaanngilagut, uuliasiortitsiviup BP-p oqaaseqartittagaa, kinaassusia taaneqanngitsoq, aviisimut oqarpoq.

Nunatta sineriaani uuliasiorniarlutik qinnuteqartut kikkuuneri Aatsitassanut Ikummatissanullu pisortaqarfiup sapaatip akunnerini tulliuttuni saqqummiunniarpai. Uuliasiorniarlutik qinnuteqartut akornanni uuliasiortitsivik BP peqataajumanani maanna nalunaarpoq.

Aatsitassanut Ikummatissanullu pisortaqarfimmi atorfillip kinaassusia oqaatigineqanngitsup, qulakkeerlugu oqaluttuaraa uuliasiortitsivik BP Naalakkersuisullu isumaqatigiissimasut, uuliasiortitsivik BP Kalaallit Nunaata eqqaani uuliasiorluni ujaasissassanngitsoq, Greenpeacep umiarsuaata Esperanzap Kalaallit Nunaata imartaaniinerani, tuluit aviisiat aamma allappoq.

Kalaalllit Nunaata imartaani uuliamik nassaartoqarnerarlugu marlunngormat ullaakkut nunarsuarmi tusagassiorfinni assigiinngitsuni sammineqarpoq, uuliasiortitseqatigiiffiup Cairn Energyp gassimik nassaarnerminik pisortatigoortumik saqqummiussinissaa sioqqullugu.

Uuliamik nassaartoqarneranik nutaarsiassaq tuluit nutaarsiassaqartitsiviannit The Guardian-mit pisuuvoq, nutaarsiassaq tusarfinnit kinaannerminnik taaseqqusinngitsunit pisuullutik.