BP naammagiunnaavippaat

Manna tikillugu uuliasiortitseqatigiiffimmi immikkut paasisimasallit Mexicop kangerliumanersuani qillerinermit uuliamik maqisoorneq unitsissinnaasimanngilaat, maannalu maqisoorneq erniinnaq unitsinneqarsinnaanngippat USA-mi nunami namminermi pissutsimnut ministerip BP suliaanik arsaarniarlugu sioorasaarilluni.

- BP peersinneqarpat apeqqutaalissaaq taanna sumik taarsissaneripput. Mexicop kangerliumanersuani sinerissamik alapernaarsuisut pisortaata Thad Allenip pisut taama erseqqitsigisumik oqaatigai.

Angut taanna tassaavoq immap naqqani 1½ kilometerimik itissusilimmi ajoqusiinerit killilersimaarnissaannik putullu qillikkap milinneqarnissaanik BP-mik suleqateqartoq. Taammattumik taassuma periarfissat killissallu ilisimassagai ilimatsaanneqarpoq.

Nunami namminermi pissutsinut ministerip Ken Salazarip BP unitsissallugu sioorasaarippat, tamanna Allenip assersuutaannaanerarpaa pimoorutivittariaqanngitsoq, tassami ajoqusiisup saniatigut suliassami tamatumani allanik immikkut paasisimasaqartoqanngimmat. Kikkulluunniit attavinnut eqqortunut attaveqarsinnaanngillat, teknikkikkut pisariaqartinneqartunik qillikkalluunniit matunissaanut atortussanik paasisimasaqanngillat.

BP taamaaliorumalluni neriorsuivoq, kisiannili oqartussaasut sinerissamilu najugallit uuliasiortitseqatigiiffimmik qatsussivipput, putu milinniarlugu misiliinerit tamarmik iluatsinngillat, mingutsitsinerlu ullormiit ullormut ajorneruleriartorluni. Uuliap anianera assiaqutsersuutinit puttasunit unitsinneqarsinnaanngilaq. Aammattaaq uuliap immap qaaniittup kemikaliat atorlugit suujunnaarsinniarnera maanna unitsinneqarpoq.

Tamakkuupput BP-p aaqqiissutissatut suliarigalui. Immikkulli paasisimasallit siunissaq ungasinnerusoq eqqarsaatigalugu kemikalianik atuineq uuliaminngarnit uumasoqassutsimut ajoqutaanerulernissaa mianersoqqussutigaat.

Maannalu aamma tassa qillerivimmiit ajutoortumit uuliap qanoq annertutiginera apeqquserneqartalerpoq. BP-p oqaatigisai nalorninarsorinarput, uuliasiortitseqatigiiffillu imminut illersorluni, ajunaarnersuarlu manna tikillugu ilimagisaminngarnit akisunerujussuussalluni.

Naggasiut:

Amerikami naalakkersuisut maanna naalagaaffiit Louisiana, Mississippi aamma Alabama uuliamik maqisoorneq pissutigalugu "aalisarnikkut ajunaaruteqarfiusutut" nalunaarutigaat. Naalagaaffiit aalisarnermik inuussutissarsiuteqarfiusut taamaalillutik Amerikami naalagaaffimmit tapiissutisinissaminnut pisinnaatitaalerput, USA-p niuernermut ministeria Gary Locke oqarpoq.

- Maqisoorneq tamanna pissutigalugu aalisartunut, suliffeqarfinnut inuiaqatigiinnullu aalisarnermik inuussutissarsiuteqartunut aningaasarsiornikkut ajornartorsiutissat pissutigalugit taamatut iliortariaqalerpugut, taama oqarpoq. Louisiananmi aalisakkanik suliffissuaqarneq USA-p aalisakkanit nioqqutissiaataasa 40 procentiannik pilersuisoq. Aammattaaq inuit 27.000-it sulisorineqarput.