BP mianersoqquneqartoq

Alaskami uuliasioqatigiiffik BP, Alaskap avannaarsuanit nuna kujammut napillugu ruujorersuartigut uuliamik pilersuisoq, mianersoqqussummik maanna tunineqarpoq.

Ruujorersuarnik pisoqalisimasunik iluarsartuussinerup kingorna, uuliamik pilersueqqilernissaminni pinngortitamik mingutsitseqqinnginnissartik BP-p uppernarsartariaqaraa, naalagaaffiup nakkutilliisitai piumasaqarput.

- Uuliamik pilersuileqqinnissaq sioqqullugu, misiliummik pilersuinerup isumannaatsumik pinissaa qulakkeertariaqartartoq Alaskami uuliasiornermut nakkutilliisut pisortaat Thomas Barret, avisimi The Associsted Press-imi taama issuarneqarpoq.

Prudhoe Bay-imi uuliasiortut iluarsartuussinermut pilersaarutertik sapaatip-akunnerani matumani tunniutissallugu neriorsuisimasut, BP pillugu USA-p senateqarfiani tusarniaanermi oqaatigineqarpoq.

Uuliap Prudhoe Bay-imeersup kujammut aqqutai ruujorit ullut arlaqanngitsut qaangiuppata misiliilluni ammarneqassasut, BP-p siulittaasua Robert Malone The Associated Press-imut taama oqarpoq.