Uuliasiortitseqatigiiffiup BP-p Mexicop kangerliumanersuani qillerivimmi Deep Water Horizonimi ajutoorneq pillugu nalunaarusiaq sivisuumik utaqqineqarsimasoq ualiartoq tamanut saqqummiuppaa.
- Uagut kisitta pisuunngilagut, USA-p oqaluttuarisaanerani uuliamik ajutoornersuit ajornersaat pillugu BP-mit taama nalunaaruteqartoqarpoq.
Nalunaarusiaq 193-inik qupperneqarpoq. Kisianni aamma BP videoliamik takussutissiorsimavoq suliffeqarfiullu isumannaallisaanermut pisortaata Marc Blyep ajutoorneq minutsimiit minutsimut misissuataartillugu.
- Metangassip aalaa puaasanngorluni qillerivimmit tassanngaannaq qummukaalerpoq, qanngorujussuartorlu qillerivik tamarmi sajuppillalluni, isumannaallisaanermut pisortaq oqaluttuarpoq.
- BP-p nalunaarutaa naapertorlugu taamatut pisoqarnerani isumannaallisaanermut atortut assigiinngitsut arfineq-pingasut ajutoorsimapput. Ilaatigut inuttat iliuuseqarnissaminnut kigaalaarpallaarsimapput. Qillerinermut cementi aamma pitsaavallaarsimanngilaq misiliinerlu siulleq amigaateqarsimalluni.
- Ajutoorneq atortulersuutit, ilusilersuinerit kukkuneqarnerannik, inuillu kukkunerisa tamarmik ataatsimoortinneqarnerisigut pisimavoq, suliffeqarfiillu arlallit, tamatumani aamma BP pisooqataapput, Marc Blye uuliasiortitseqatigiiffimmeersoq oqarpoq.
Suliffeqarfiit allat BP-p pisooqatai ilaatigut tassaapput suliffeqarfik cementimik pisiffiusoq, kiisalu suliffeqarfiit qillerivimmik sanasuusimasut.
Kikkut pisuusimanerisa inissinnissaannik apeqqut pingaaruteqarpoq, tassami qillerivimmi ajutoorujussuarnermut akisussaasunut taarsiivigineqarnissamik piumasaqaatit milliardikkuutaanik aningaasartallit utaqqimmata. Akiligassaq taanna BP-p kisimiilluni akilerumanngilaa, tassami uuliamik ajutoornersuaq uuliasiortitseqatigiiffimmut 50 mia. koruuninik akeqareersimammat.