BP kiattup anorersuanit ulorianartorsiortinneqarpoq

Uuliasiortitseqatigiiffik BP Mexicop Kangerliumanersuani ullumi allanik ajornartorsiutissaqalerpoq. Tamaani kiattup anoraanik anorersuaq ulorianartorsiortitsivoq, uuliamillu maqisoorfiup milinneqavinnissaa ajornarsisinnaalluni.
juulip 22-at 2010 10:09

Kiattup anorersuata ullup unnuallu ataatsip marlulluunniit sinerissamut angunnissaa 50 procentimik ilimanaateqartoq Amerikami silasiortut nalilerpaat.

Anorersuarnerani BP-p allatut ajornartumik talartiusarsuaq 75 tonsiusoq juulip 13-ianni uuliamik aniaffiup aserortup qaavanut inissinneqarsimasoq ammaqqittariaqalersinnaavaa. Talartiusarsuaq BP-minngaanniit USA-milu naalakkersuisunit isumalluarfigineqakanneraluarpoq, uuliamik maqisoorneq aatsaat siullermeerluni unitsivinneqaraluarmat.

Isumalluaraluarnerli silassamit ilimasaarutit aserorneqarpoq. Tassami similiussaagallartoq ingeniørinit sila pissutigalugu nakkutigineqarsinnaanngimmat. Aammattaaq uuliap imaaniittup sinerissamiittullu katersornissaa anorersuarmit ajornartorsiortitaassaaq.

- Sila allatut ajornartumik alaatsinaalluinnartariaqarparput pilersaarutivullu aqqutaani iluarsaallugit, BP-mi pisortap tullia Kent Wells oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq