BP Alaskami aamma uuliarluerpoq
BP-p qilleriviani Mexicop kangerliumanersuani uuliaarluernerujussuup qaammat sinnerlugu unitsinneqarneq ajulersup saniatigut, Alaskami uuliasiorfimmi ajutoorneq uuliasioqatigiiffimmut maanna ilungersuatitsivoq.
Alaska napillugu ruujorersuit uuliap akuiarneqanngitsup aqqutai Trans-Alaska-mik taagukkat, uuliamik pilersuinermut pingaaruteqaqisut maqisoorfiummata, ruujorit ilaat kilometerit tuusintit sinnilinnik isorartussuseqartut matusariaqarsimapput.
Uulia akuiarneqanngitsoq nappartanik tuusintilippassuarnik annertussusilik maangaannaaq kuussimavoq, siaruatsaaliorlugulu maanna sapusiorneqarsimalersoq, BP-mit nalunaarput.
Uulia aniasoq tankersuarnut isumannaallisakkanut immiussuunneqareeraluartoq Trans-Alaskap qaqugu ammaqqinneqarnissaa suli nalunarpoq.