Boris Tadic ajugaaqqalaarpoq

Nikolicip ajorsarnini nassuerutigaa, Tadicilu 51,1 procentinik taaguunneqarsimaneranik pilluaqqullugu, illuatungiliuttut Ruslandimik suleqateqarusuttuusut 47,2 procentinit taaguunneqarsimapput.

Qinersinerup inernera ippassaq sapaammi unnukkut suaarutigineqarmat Tadic partiialu Demokratiskiusoq illersuisunit nuannaarutigineqangaarpoq. Serbiamiut tusindtilippassuit illoqarfiit pingaarnersaata, Beogradip, aqqusernginukaarrapput, biilerpassuillu siggartarrapput, inuppassuillu partiip Demokratiskiusup erfalasuanik, sungaartumik tungujortumillu qalipaatilinnik, tigummillutik illoqarfiup qeqqanukaarrapput.

Serbiap aqqutissiuunneqarnissaa præsidentimut qinersinermi aalajangiisussarujussuuvoq. Serbiap Ruslandimik suleqateqarnissaa Nikolicip qineqqusaarutigigaa nunap kunngiitsuuffiusup EU-mut qanillisinnissaa Tadicip qineqqusaarutigaa.

Kosovop Serbiamut atajunnaarniarluni pilersaarutaa qineqqusaartut taakku arlaannaataluuniit tapersersunngilaa.

Kosovop Serbiamut atajunnaarniarnera sapaatip akunnerini tulliuttuni aalajangerneqartussaavoq.