Boris Johnsonip coronavirusimik siaruatsaalinermut Manchesterimi killilersuinerit sukannernerulersikkai
Tuluit Nunaata kimmut avannarpasissuani illoqarfik Manchester, coronavirusip siaruatsaalinissaanut upalungaarsimaniarnermi immikkoortut pingajuannut, immikkoortuni qaffasinnerpaamut, tallimanngorpat inissinneqassaaq.
Tuluit ministeriunerat, Boris Johnson, tusagassiortunik marlunngornermi katersuuutsitsinermi taama nalunaarpoq.
- Iliuuseqanngikkutta Manchesterimi peqqinnnissaqarfik innuttaasullu aarlerinartorsiulissapput, Johnson oqarpoq.
Imerniartarfiit tallimanngornermit tamanna pillugu matoqqalernissaat peqqussutaavoq.
Upalungaarsimaniarnermi immikkoortut pingajuannut inissinnermi inoqutigiinneersuunngitsunik illup iluani katersuuttoqarsinnaanavianngilaq. Nammineq naatsiiverisani tamanna aamma atuuppoq.
AAMMA ATUARUK Corona: Londonimi angersimaffeqatigiit kisimik illup iluani naapeqqusaasut
Imerniartarfiit allallu nerisassanik sassaalliiffiunngitsut matoqqassapput. Imigassarlu aalakoornartoq nerinermi taamaallaat iggisigineqarsinnaassalluni.
Tuluit Nunaata tamakkerlugu matoqqinneqarnissaa pinngitsoortinniarneqartoq, Boris Johnsonip tv-qarfimmit BBC-mit apersorneqarluni oqaatigaa, matoqqinneqaratarsinnaanerali sillimaffigineqartariaqartoq aamma oqaatigalugu.
Tuluit Nunaata kimmut avannarpasissuani coronavirusimik tunillatsissimasut piffissami kingullermi amerliartungaatsiarsimapput.
Liverpool upalungaarsimaniarnermi immikkoortut pingajuannut aamma inissinneqarpoq.
Illoqarfiit pingasut allat upalungaarsimaniarnermi immikkoortut pingajuannut aamma inissinneqaratarsinnaasut, aviisi Metro allappoq. Illoqarfiit pineqartut tassaapput Leeds, Bradford Sheffieldilu.