Boris Johnsonip covid-19-imut akiuussutissamik juullertinnagu pilersuisoqarsinnaalissangatikkaa
Covid-19-imut akiuussutissamik siunissami qaninnerusumi pilersuisoqarsinnaalernissaa ilimanarpoq, inuillu akiuussutissamik pisariaqartitsinerpaat juullertinnagu akiuussutissamik kapineqarsinnaassagunarlutik.
Tuluit ministeriunerat, Boris Johnson, videoliami inoqatinut attaveqaammi Twitterimi ullaaq manna ataasinngornermi saqqummersinneqartumi taama oqarpoq.
Boris Johnson inummut coronavirusimik tunillanneqarsimasumut qanillivallaarsimanini peqqutigalugu ulluni tulliuttuni 14-ini angerlarsimaannaqquneqarpoq.
Ajunnginninili innuttaasunut erseqqissaatigaa.
AAMMA ATUARUK Boris Johnsonip coronavirusimik siaruatsaalinermut Manchesterimi killilersuinerit sukannernerulersikkai
Naalakkersuisoqatinilu coronavirusip siaruatsaaliornissaa sulissutigigitsik ilanngullugu oqaatigaa.
Innuttaasut peqqinnissaqarfiup innersuussutaannik malinninnissaat Johnsonip aamma kaammattuutigaa.
Kikkut akiuussutissamik tunineqarnissamut salliutinneqassanersut Johnsonip videoliami oqaatiginngilaa.
Innuttaasulli amerlanerit naammagittartariaqassasut, tuluit peqqissutsimut ministeriat Matt Hancock erseqqissaavoq.
- Akiuussutissap piaarnerpaamik siammarterneqarnissaa sulissutigineqaraluartoq innuttaasut amerlasuut akiuussutissamik ukiumi nutaami aatsaat kapineqarsinnaanissartik naatsorsuutigissavaat, taanna oqarpoq.
