Borgmesterit angalanissatik allanngorartippaat
Ullo´qeqqanut Radioavisimi Sermitsiap oqaluttuaa naapertorlugu oqaatigineqaraluarpoq, kommunit kattussuunnissaat pillugu inatsisartuni saqqummiussisoqarpat, borgmesterit, inatsisartuni aamma ilaasortaasut, arfinillit, inatsisartuniinnavianngitsut. Tamannali eqqunngilaq!
Agnethe Davidsen, Augusta Salling, Vittus Mikaelsen, Anton Frederiksen, Otto Jeremiasen Jens Lars Fleischerilu. Taakkua arfiniliullutik borgmesteriutigalutik inatsisartuni ilaasortaapput.
Borgmesterit ukiut tamaasa ataatsimeeqatigiittarput, ukioq mannalu ataatsimeeqatigiinnissaq ilallugu EU-mi Bruxelles-imut, Københavnimut angalanermik naggaserlugu, ataatsimeeqatigiinneq ilaneqartussaavoq.
EU-mi ingerlariaaseq borgmesterit Bruxelles-imi paasisassarsiorfigisussaavaat, aammalu paasiniartussaalugu EU-p aningaasalersuisarneranut qanoq ililluni ilannguttoqarsinnaanersoq. Taassumalu kingorna borgmesterit ataatsimeeqatigiinnerat Københavnimi ingerlanneqartussaavoq.
Angalanissami pilersaarutit imaakkaluarput: Ngalneq tallimanngornemi marsip qulingiluaani aallartittussaavoq, EU-milu pissutsit ataasinngornerup tungaanut paasiniarneqarssallutik, borgmesterillu ataatsimiinnerat Københavnimi taassuma kingorna ingerlanneqassalluni.
Inatsisartulli upernaakkut ataatsimiinnerata ammarneqarnerani, kommunit kattussuunnissaat inatsisartuni eqqartorneqartussanngormat borgmesterit inatsisartuni ilaasortaajutigisut arfiniliusut akornanni tallimat pilersaarutiminnik allanngortitsipput: borgmesterit ilaat Bruxellesiliarnermut aatsaat ataasinngornermi marsip aqqaneq-aappaanni aallarniarput, ilaalli Bruxellesilianngiivillutik aatsaat pingasunngornermi marsip 14-iani Københavniliassapput.
Borgmesterini inatsisartuni ilaasortaatigisuni arfiniliusuni, taamaallaat Vittus Mikaelsen, Tasiilami borgmesteriusoq, inatsisartuni ataatsimiinnermi peqataassanngilaq. Taanna oqarpoq inatsisartuni sulinngiffeqarniarluni qinnuteqaat inatsisartut siulittaasoqarfianut nassiussimasani suli akineqarsimanngitsoq, aammalu Tunumiit nunanut allanut angalaniartarnermi pilersaarusiornissaq ajornakusoortarmat, blilitsillu imaaliallaannarluni allanngortinnissaat ajornakusoortarmat, angalanissamut pilersaarutit allanngortinnianngikkini, Tasiilami borgmesteri Vittus Mikaelsen oqarpoq.
