Borgmesterit: Akileraartitseriaaseq allanngussappat kommunit eqqugaassapput

Tassami akileraarutitigut isertissinnaasat annaaneqassapput. Aamma kommunit namminersortuunerat kalluarneqassaaq soorluttaaq inuussutissarsiutitigut ineriartortitsinissamut periarfissat annikillissasut.

- Pilersaarutit angisuut, soorlu Alcoatut ittut sananeqarnerisa nalaanni sulisut nunani allaneersut akileraarutaasa Nunatta Karsianut tuttarnissaannik Naalakkersuisut eqqarsaasersuutaat, Qeqqata Kommunianiit eqqunngillunnaqqissaartutut isigaarput, Qeqqata Kommuniani borgmesteri, Siumumeersoq Hermann Berthelsen, oqarpoq.

Tassami ilanngaasigaanngitsumik akileraartitseriaaseq atuutilissappat, taava aatsitassarsiorfiit sanaartukkallu angisuut Alcoatut ittut sanaartorneranni sulisuusut nunani allaneersut akileraarutaannit isertitat tamarmik Nunatta Karsianut tussapput, kommunillu aningaasassaaleqisut pissarsinatik.

Taamannak aaqqiisoqassappat, kommunit eqqugaassasut, Hermann Berthelsen oqarpoq.

- Meeqqeriviliornerit, aqqusinniornerit, kuuffissualiornerit illoqarfiullu immikkoortortaanik nutaamik sananerit, aamma kommunip aningaasartuutigisussaavai. Taamaakkaluartorli sanaartornermi isertitassat Naalakkersuisut tamaasa piumavai. Taanna naapertuutinngilluinnarpoq. Assersuutigalugu Alcoa-p Maniitsumi pilersaarutaa aallartinneqassagaluarpat, kommunitut akissaqanngilagut, Hermann Berthelsen oqarpoq, nangillunilu:

- Aamma ineriartortitsiffigisinnaasagut taamalillugit killersorniarneqartutut isikkoqalerput.

Aamma Kommuneqarfik Sermersuup borgmesteriata, IA-meersup Asii Chemnitz Narupip, ilanngaasigaanngitsumik akileraarusersueriaasissatut siunnersuut iluarinngilaa.

- Suliassagut taakkuutillugit akileraarusersuinissamut tunngaviusumik pisinnaatitaaffipput mangiarneqartariaqanngilaq.

Asii Chemnitz Narupip Hermann Berthelsen isumaatigaa oqarmat, pilersaaarutit angisuut sanartorneqarnerisa nalaanni kommunit aningaasartuutaat aamma qaffassasut.

- Kommunini sisamani suliassat ikililerneqarnissaannik takunnissinnaanngilagut. Suliassagullu taakkuutillugit mangiaasoqalernera iluaattorujussuuvoq.

Kommunit Naalakkersuisullu akornanni aningaasaqarnikkut avitseqatigiittarneq siunissamik qanoq ittuunissaannik tunngaviusumik oqallinnissaq, Asii Chemnitz Narupip kissaatigineruaa. Massakkut siunniunneqartoq ima nalileramiuk:

- Kommuninit pisinnaatitaaffiinik annikillileriniarpasittoqarmat iluaappoq. Isumaqatiginninniutissagut aningaasanut tunngasut taamaammat annertunerujussuupput.