Borgmesterip AUL-imi atukkat tupaallaatigai

Arctic Umiaq Line matusariaqassaguni inuiaqatigiit angalanissaminnut mattunneqassapput, kujataamiullu aqqutissamik ajornartorsioreeqisut artukkerneqaqqissapput, tamannalu Simon Simonsenip ajorluinnarsoraa.

- Sarfaq Ittuk inuiaqatigiinnut pingaarutilerujussuuvoq, isumaga malillugu pingaaruteqartorujussuuvoq. Annilaangaginerpaara kujaataata mattunneqartutut inissisimalernissaa angallanneq eqqarsaatigalugu. Umiarsuaq angallassiunnaarpat kingunerissavaa tikikkusuttut kujataaniillu aallarusuttut amerlasuut killilersimaarneqarnerulernerat, Simon Simonsen oqarpoq.

Aamma oqaatigaa nunani allani ileqquusut assigalugit Naalakkersuisut tapiissuteqartariaqalersut, angallassineq oqinnerpaaq anguniarlugu.

-Nunani allanisut suliffeqarfinnut tapiisariaqalerput, umiarsuimmi inunnik angallassiunnaarpata ilimaginngilara timmisartuussileqatigiiffiup Air Greenlandip angallassineq kisimiilluni nammassinnaagaa, Simon Simonsen nangippoq.

Kommune Kujalliup borgmesteriata neriuutigaa angallannermut isumalioqatigiissitap Naalakkersuusullu pitsaasumik ataqatigiissumillu angallannermut aaqqissuisoqarnissaat inuiaqatigiinnut kujataamiunullumi iluaqutaasussamik:

-Neriuutigaara angallannermut isumalioqatigiissitap suliatik eqqarsaatigilluassagai, taamaasilluta pitsaasumik ataqatigiissumillu siunnersuisoqarniassammat, kujataani angallannermut iluaqutaasussamik, Naalakkersuisunit akuerineqarsinnaasumik, Borgmester Simon Simonsen naggasiivoq.

Angallannermut isumalioqatigiissitap siulittaasua Christen Sørensen KNR-imit ullumi oqaaseqartinniaraluaratsigu piumasimanngimmat iluatsitsinngilagut.

Siulittaasup isumalioqatigiissitap nalunaarusiaa saqqummertinnagu nunatsinni angallannermut pissutsit oqaaseqarfigiumanngilai.

Nalunaarusiaq juulip qaammataani Christen Sørensenip saqqummissanerarpaa.