Borgmesterinngortussat oqarasuaatip eqqaani utaqqipput
Asii Chemnitz Narup oqarpoq: Assigiinngitsorpassuartigut januaarip aallaqqaataani malugineqarsinnaassaaq pitsangorsaateqartugut, kisiannili aamma isumaqarpunga piviusorsiornerusoq oqassalluni 2009-p ingerlanerani sullissinerit assigiinngitsut inissikkiartuaartussaassapput. Massakkorpiaq pisortaanerusussap saniatigut aamma pisortassanik allanik pingasunik sulineq ingerlapparput tassunga tunngatillugu KANUKOKA-mut allagaqaqqammaerpugut atorfinitsitassatta pitsaasumik akissarsiaqartinnissaat anguniarlutigu, Asii Chemnitz Narup oqarpoq. Hermann Berthelsenilu imatut naliliivoq: Piareersarnitsinnut atatillugu majimi Naalakkersuisunik ataatsimeeqateqarnitsinnit nammineq imaqarniliaminni takusinnaasariaqarpaat ajornartorsiortoqartoq, taakkualu iluarsiniarnissaannut Naalakkersuisut neriorsuutigivaat iluarsiniarneqarnissaannut peqataassallutik, annertunerusumillu aningaasaliinerit tassuuna aamma ingerlatsinissaannut namminneerlutik aamma suliniuteqassallutik. Taamaammat uani sulinermi ikkarliffissaqartippallaarata sulitittariaqarpatigut. Minnerunngitsumik aningaasatigut toqqammavissatsinnik tunilaartariaqarpaatigut, piaarnerpaamik, Hermann Berthelsen oqarpoq.