Borgmesterinngortuni inissittoq kingulleq

Kommune Kujallermi Demokraatit aamma Siumut ataasinngornermi unnukkut suleqatigiilerput, kommunimilu borgmesterinngortoq Malene Vahl Rasmussenimik ateqarpoq.

Kommunalbestyrelsit nutaat Malene Vahl Rasmussen siuttoralugu kommuni aningaasaqarnikkut tukattumik inissisimasoq tiguaat, taamaakkaluartoq kommunalbestyrelsit nutaat ‘akisussaaffimmik tigusisoq aammalu qisuariallaqqinnerusoq’ ataatsimoorlutik anguniagassatut pilersinneqassasoq, tusagassiutinut nalunaarutiminni allapput.

- Politikkikkut anguniakkagut anguneqassappata, taava pisariaqarpoq aqutsisut taavalu kommunemi ulluinnarni sulisut suliassaq artussanngikkaat. Taamaammat eqqortunik nutaanillu inuttassarsiornissaq siullertut suliarissavarput. Politikkikkut anguniakkagut piviusunngorsinnaaniassammata, borgmesterinngortussaq, Malene Vahl Rasmussen oqarpoq.

Kommunalbestyrelsip ilaatigut aningaasaqarnikkut iluarseeqqinniarneq, inuussutissarsiutitigut inerisaaneq, isumaginninnikkut iluarsaassineq attaveqaasersuutitigut nukittunerusumik siunnerfeqarnissaq ukkatarineqassasoq, tusagassiutinut nalunaarummi allaqqavoq.

- Kommunerput qaqeqqissappat ingerlaqqissappallu aningaasanik nutaanik pilersitsinissarput qulakkeertariaqarparput. Aningaasat nutaat isumaqarpoq sulisut akileraartartut amerlisariaqarput. Taamaammat inuussutissarsiornikkut inerisaanissaq pingaartorujussuuvoq, Malene Vahl Rasmussen oqarpoq.

Kommune Kujallermi innuttaasut akornanni ulluinnaat pitsaanerulernissaannut tunngaviliisussanik ukkatarinnilluta anguniarniarparput, partiit taakkua marluullutik oqarput.

- Komunitta orniginarsarnissaa aamma suliarisussaavarput. Sineriammi kujataarmiut, imaluunniit kalaaleqatigut maanga nuunnissaat pilerinarsarlugu piareersassavarput. Meeqqeriveqarneq atuarfeqarnerlu qitiusorujussuupput. Annertuumik aamma taanna pilersaaruteqarfigivarput, neriuppunga aamma taakku iluatsikkumaartut, taanna oqarpoq.

Kommunalbestyrelsit nutaat kommunip innuttaasuinut anguniakkaminnik qanoq piviusunngortitsiniarnersut tusagassiutinut nalunaarutaanni allaqqanngilaq. Innuttaasunut anguniagassatut siunnerfiit kissaataannaanngitsut pituttuisuusulli, partiit taakkua marluk allapput.

IA-p pissaaneq iperaraa

Partiit taakku marluk katillugu aqqaneq-marlunnik ilaasortaatitaqarput, ‘kommuni nutaamik siunissamilu nukittunerusmik ingerlatilissallugu akisussaaffimmik tigisivunga’ borgmesterinngorlaaq oqarpoq.

Demokraatit Kommune Kujallermi taaguunneqarluarput. Kommunimi tamani 39 procentingajalluinnarnik taaguunneqartoq, Qinersineq.gl-imi takuneqarsinnaavoq.

Taakkua taamaalillutik partiini annerpaanngorput, illuani IA Stine Egedelu, kommunimi maannamut siuttuugaluartut, ajalusuuvissorpasittut.