Borgmesterimik qinersinissaq pissanganartoq

Nuuk kommuneani borgmesterimik nutaamik qinersineq ualeru tallimanut ingerlanneqassaaq. Agnethe Davidsen sapaatiummat toqussi tikillugu Nuuk kommuneani ukiuni 15ngajanni borgmesteriuvoq taartissaanillu qinersineq pissanngatigineqarpoq.
Allattoq Jaaku Lyberth
decembarip 01-at 2007 13:16

Partiit Nuup Kommuneani kommunalbestyrelsemi ilaasortaatitaqartut borgmesterissatut piukkutaminnik qinigassanngortitaqassapput. Borgmesteriugallartoq Maliinannguaq Marcussen Mølgård Inuit Ataqatigiit sinnerlugit kommunalbestyrelsemi ilaasortaasoq Nuummi Inuit Aqatigiinnit borgmesterissatut qinigassanngortippat. Ualip ingerlanerani IAp partiit sinneri ataatsimeeqatigissavai, borgmesterimik qinersinissamik ataatsimoortulutik Demokraatit borgmesterissatut qinigassanngortippat partiip siulitaasua Per Berthelsen kommunalbestyrlsemut kingullermi qinersinermi Agnethe Davidseniugaluamit 100inik ikinnerusunik qinerqartoq. Borgmesterimut qinersinissamut atatillugu Demokraatit Atassukormiullu Nuuk kommunalbestyrelseani ilaasortaatitaat Hans Pavia Egede ualimut ataatsimiipput, kingornalu Inuit Ataqatigiit ataatsimeeqatigineqarlutik.

Nuuk Kommuneani kommunalbestyrelsemi ilaasortat ataasiakkaat partii apeqqutaatinnagu borgmesterissamut piukkutaminnik qinersinissaminnut periarfissaqarput.

Nuuk kommunalbestyrelse ualeru tallimanut ataatsimiissaaq, borgemesterissarsiorneq kisimi ataatsimiissutigineqassaalluni. Ataatsimiinneq Nuuk TV-atigut toqqaannartumik aallakaatinneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq