Borgmesteri: -Ålborgimut aqqut allanut aamma ammaassissaaq

Nuummiit Ålborgimut tassa Nuup illoqarfittut ikinngutaanut toqqaannartumik timmisartortoqartalernissaa Nuummi borgmesterip, Agnethe Davidsenip kissaatigisimavaa, tamannalu

Ålborgimi borgmesterip tapersersorluinnarpaa.

Agnethe Davidsen oqarpoq tamanna ukiut marluk matuma siornatigulli Nuup timmisartoqarfiata tallineqarnissaanut atatillugu suliaqarnerminni taamatut kissaatigisaqarlutik oqaloqatigiissutigisimagitsik.

- Aqqut taanna atulerpat Københavniinnarmuunngitsoq aamma allanut timmisartorsinnaalernissamut periarfissaalissagami, Agnethe Davidsen oqarpoq.

Taanna tunngavilersuivoq Nuuginnaanngitsoq nunattali tamarmi Ålborgimut attaveqaatai arlaqartut Ålbogimiinnerat tunngavigalugit taama isumaliulersimallutik.

- Umiarsualiveqarneq Ålborgimiiginnassasoq aalajangiivigineqarpoq taamatuttaaq Royal Greenland Ålborgimi najugaqarpoq aammattaaq inuusuttortagut arlalissuit ilinniagaqarlutik Ålborgimiipput. Eqqartorparpullu immaqa sapaatip-akunneranulluunniit ataasiarluni Ålborgimut toqqaannartumik timmisartorsinnaalernissaq taanna ammaaffigineqarsinnaassasoq, oqarpoq.

Agnethe Davidsenip ilaasussat Ålborgimut ingerlasussat naammassangatippai.

- Danmarkiliartummi Ålborgiliartumut ilaasassapput, tassami Danmarkiliartorpassuit Danmarkip ilaanut Kastruppimiit ingerlaqqittorpassuusarput ilaatigut soorlu Ålborgimut. Taamaattumik apeqquserneqarsinnaanngilaq tamannalu apeqquserneqassappat aaamma aperisoqarsinnaavoq ullumikkut Danmarkiliartartut ikippallaannginnersut, oqarpoq.

Aperaarput aqqut taanna qaqugu ammarneqassanersoq. – Massakkut oqarsinnaanngilanga qaqugu ammarneqassasoq apeqqutaavoq mittarfimmut tunngatillugu inatsisartut oqallinnerat qanoq inerneqarumaarnersoq.

Erseqqissaatigaa apeqqut tamanna inatsisartuniit kinguarteqattaartuarneqarsimasoq naak namminneq ukiulli qulit matuma siornatigut mittarfiup allinissaa oqaluuseralugulu piareersarnikuugaluaritsik.