Ruslandimi uuliakoortoqarnerani borgmesteri unnerluutigineqartoq
Ruslandip illoqarfiani Norilskimi borgmesteri qaammatini arfinilinni parnaarussaaratarsinnaavoq. Russit paasiniaasartuisa misissuereerlutik borgmesteri Rinat Akhmetchin mianersuaalliorsimasutut sisamanngornermi unnerluutigigaa.
Sibiriap qanittuani nukissiuuteqarfimmi uulia 21.000 tonsi imaanut uuliakoormat borgmesterip piaartumik iliuuseqarsimanngitsoq russit paasiniaasartui isumaqarput.
Nukissiuuteqarfimmi Norilsk Nickelimit pigineqartumi nunap qeriuaannartup aannerani uuliaasivik ajalusoorpoq.
AAMMA ATUARUK Siberiami uuliakoorujussuartoqarmat saliisoqalerpoq
Uuliakoorneq maajip 29-ani pivoq, sumiiffimmilu oqartussat arajutsisimagaluartut ullut marluk qaangiummata nittartakkatigut inuit naapittarfiini siammarterisoqarnerani uuliakoortoqartoq paasisimallugu.
Nukissiuuteqarfimmi sulisut qaffasissumi atorfeqartut pingasut tigusarineqareerput, aqaguanilu borgmesteri unnerluutigineqarpoq.
Nukissiuuteqarfimmi sulisut uuliaasiviup 2018-imili iluarsaanneqartussaagaluartup suliarineqarsimanngitsup atuinnarsimanera pissutigalugu unnerluutigineqarput.
Uuliakoorneq annerpaaq Ambarnayap kuussuaaniipput.
Uuliakoorneq Exxon Valdez-imi 1989-imi pisumut Greenpeacemit sanillersuunneqarpoq. Taamani umiarsuaq uuliamik assartuisartoq ikkarlimmat uulia akuiagaanngitsoq 37.000 tonsi Alaskap kitaatungaata imartaanut uuliakoorpoq.
