Borgmesteri sulinngiffeqartoq utaqqivaat
Kommunemi borgmesteri Jess Svane, Siumut, sulinngiffeqarluni Danmarkimiippoq, kommunalbestyrelsemilu partiimi ilaasortaaqatai, kommunip aningaasatigut inissisimaneranik erseqqissumik ilisimatinneqarusupput.
Kommunalbestyrelsep ataatsimiinneranik unitsitsineq Qaasuitsup kommuniani borgmesteriugallartup Timooq Mølgaardip, illuatungiliuttut partiianni Atassummi ilaasortaasup, akueriuminaatsippaa.
- Oqaluuserineqartussat imaannaanngimmata, sipaarniutissat eqqarsaatigalugit, Timooq Mølgård oqarpoq.
Kommunalbestyrelsip ataatsimiinnera Timooq Mølgaardip aquttussaagaluarpaa.
Kommuni aningaasatigut ilungersunartorsiortoq kikkunit tamanit ilisimaneqarpoq. Taamaattoq kommunalbestyrelsemi ilaasortat 17-it Ilulissani ataatsimeeqataanissaannut Qaasuitsup kommunia 257.00,00 kooruninik aningaasartuuteqarpoq.
Aningaasat ikinnerpaamik 15 millionit koruunit sipaarneqarnissaat ataatsimiinnermi pingaarnertut oqaluuserineqartussaagaluarpoq.
Kommunalbestyrelsip ataatsimiinnnerani ataatsimiititaliat sipaarutissanik naasaarnissaannik peqquneqartussaagaluarput. Ilaasortat sisamat najugaqarfigisaminnit oqarasuaatikkut ataatsimeeqataasussaagaluarlutik.
Kommunip borgmesteriata Jess Svanep, sulinngiffeqarluni Danmarkimiittup, kommunalbestyrelsemi tunuliaqutai, tassaasut Siumut aamma Inuit Ataqatigiit Qaasuitsup kommuniata aningaasatigut inissisimanera pillugu erseqqissumik paasitinneqarusupput.
Ataatsimiinnerup kinguartinneqarnissaa amerlanerussuteqartunit, tassa Siumup IA-llu ilaasortaanit taasissutigineqarmat, ataatsimiinnissaq oktoberip aqqarnganut kinguartinneqarpoq.
Illuatungiliuttut tassaasut Atassut, Kattusseqatigiit Demokraatillu kommunalbestyrelsip ataatsimiinnerata kinguartinneqarnissaanut itigartitsillutik taasigaluarput, soorluttaaq Siumumi ilaasortaq ataaseq, partiini Siumut taaseqatiginagu kinguartitsinissamut itigartitsisoq.
Karl Kristian Kruse, kommunalbestyrelsimi Siumut gruppemi siulittaasoq oqarpoq, oqaluuserineqartussat nukinginnartuusut, taamattorli borgmesteri tikippat ataatsimiinnerup ingerlanneqarnissaa kommunalbestyrelsimi aalajangerneqartoq. Taassuma aamma neriuutigaa tamanna ingerlanneqarumaartoq.
Karl Kristian Kruse Niaqornanut nunaqarfigisaminut marlunngorpat utissaaq. Kommunalbestyrelsemi amerlanerussuteqartut sunarpiaq paasissallugu pisariaqartinneraat, Karl Kristian Krusep oqaatigerusunngilaa.
Borgmester Jess Svane oqaaseqartinniaraluaratsigu iluatsinngilarput.
