Borgmesteri: Soraarsitaasussat ernumassutissaqanngillat

Aasianni saattualerisut 30-t soraarsitaasussat ernumassutissaqanngitsut, Aasianni borgmesteri oqarpoq.

Aasianni suliffissuaq kingumut raajalerinermik suliaqalissasoq juulip aallartisimalernerani tamanut nalunaarutigineqareersorlu Aasiaat kommunalbestyrelsianni illua-tungiliuttuneersoq Ane Hansen uparuaavoq. Uparuaanerli tunngavissaqanngitsoq, Enok Sandgreen oqarpoq.

- Siullermik oqaatigissavara Aasiaat Fabrikkiata raajaleriffittut ukioq naallugu suliffittut ammaqqinneqartussanngornera nuannaarutigeqigatsigu, Enok Sandgreen Aasianni borgmesteri tusagassiuutinut nalunaarummini aallartippoq.

- Raajaleriffik suliffiussaaq uneqattaartuunngitsoq, tamanna sulisartunut pingaaruteqarluinnarpoq. Siornatigut raajalerinerup ukiuunerani qaammatini sisamani tallimani unikkallartarnera oqaluttuaannanngussaaq, suliffik ataavartoq ukiup nikinnerani ingerlanneqartussaanngussammat.

Aallartinnermi inuit 60-it sulisorineqassapput, taakkualu saniatigut eqqiaasut, usingiaasut usilersuisullu, maskiinalerisut, kallerup inneranik nakkutiginnittut allallu pisariaqartinneqartut sulisorineqalissapput. Taakkuinnaassanngillalli.

Enok Sandgreen oqarpoq, kilisaatit sullinneqarnerat kommunimut aamma isertitsissutaalluartussaatut neriuutigigitsik, tassani orsersuinerit taquassalerinerillu pinngitsoorneqarsinnaanngitsut ilaatigut niuertarfinnut, taxaatilinnut allanullu isertitaqarnerulissutaassammata.

- Aasiaat kommuneata akileraarutitigut isertittagai qularutissaanngittumik amerleriassapput, kommuneqarfitta ingerlanneranut ineriartortinneranullu mikinngitsumik iluaqutaasussat, borgmesteri oqarpoq.

Taamaammat assagiarsuleriffimmi suliunnaartussat ernumassutissaqarsorinngilai.

- Assagiarsunnik tunisassiorneq ukiuni kingullerni marlunni annikissimavoq. Assagiarsunnillu tunisinerup naggataamik 27. juli 2007-imi pinissaa uggorigaluarlugu, piginnittuulersut Polar Raajat / Polar Seafoodip fabrikkip raajaleriffinngortinnissaa isumagissammassuk killiliussaat ataqqivarput, ingerlaqqipporlu.

- Aasiaat Kommunalbestyrelsianni illua-tungiliuttut oqariartuutigivaat sulisut suliunnaartussat iliuuseqarfigineqartariaqartut, soorunami pisussaaffigivagut arlaatigut iliuuseqarfiginissaat.

Kommunimit maanna misissorneqarpoq, assagiarsulerisut suliunnaartussat raajalerinermut ikaarsaariartinneqarnissaannut atatillugu pikkorissartinnissaat suliffissuup ammaqqinnissaata tungaanut ingerlanneqarsinnaanersut.

- Ingerlatsisuulersussat peqatigalugit misissuivugut, neriuppugullu tamanna iluatsittumik angusaqarfigisinnaassallutigu, Enok Sandgreen oqarpoq, naggataagullu erseqqissaatigaa Aasianni suliffissaaleqineq ukiorpassuarni atuuttuarsimasoq kommunalbestyrelsep naalakkersuisut peqatigalugit suleqatigiissitaliornikkut iliuuseqarfiginiagaat kiisami kinguneqalersoq.

- Suliffissaaleqineq ukiuni tulliuttuni qanoq anigorniassanerlugu suleqatigiissitaliap suliaa naammasseqqammerpoq aggustillu aallartilaarnerani naalakkersuisunut tunniukkiartorneqartussaalluni, Aasianni borgmesteri Siumumeersoq naggasiivoq.

Aasianni assagiarsuleriffik / saattualeriffik tallimanngorpat naggammik ammassaaq, assagiarsunnillu tunisassiorneq Qeqertarsuarmut nuunneqassalluni.

Qaleralinnik tunisassiorneq Kangaatsiami ingerlanneqassaaq, raajalerinerlu oqaatigineqareersutut Aasianni ingerlanneqalissalluni.