Borgmesteri imminut sanngiinnerarluni nassuersimanerarpaa
Johanne Nielsenip nammineerluni Qaanaap kommunalbestyrelseanut nalunaarutigaa tarnimigut sanngiitsuugami taamalu kommune sanngiitsumik aqqunneqarnissaa kissaatiginnginnamiuk tunuarnissi kissaatigigini, taama oqarpoq Qaanaap kommuneani Siumut tunuliaqutaralugu kommunalbestyrelsemi ilaasortaq Niels Qujaukitsoq. Taassuma taama oqarneranut tunngaviuvoq Qaanaap borgmesteriata sapaatip-akunnera kingulleq tunuarniumminut innuttaasunit malersorneqarnini tunngavigigini.
Siumut tunuliaqutaralugu Qaanaami kommunalbestyrelsemi ilaasortaq viceborgmesterillu aappaattut inissisimasoq Niels Qujaukitsoq oqaluttuarpoq, borgmesterertik kommunalbestyrelsemut nassuersimasoq tarnimigut sanngiitsuunini tunngavigalugu taamalu kommuni inummik sanngiitsumik aqunneqaqqunagu tunuarniuteqarluni.
Niels Qujaukitsoq oqaluttuarpoq borgmesterip tunuarniutaa kommunalbestyrelsemit tamarmiusumit akuerineqarsimasoq aammattaaq borgmesterip nammineq parteeqataasa tassa Atassutip tamanna akuersaarsimagaa.
Niels Qujaukitsoq qalleqqissaavoq siusinnerusukkilli tamanna piumasarisimagitsik malugigamikkuli kommunalbestyrelsep tamakkiisumik aalajangiussai naammassineqartanngitsut.
Niels Qujaukitsoq aamma tunngavilersuivoq Johanne Nielsenip Qaanaami innuttaasunik pisuutitsiniarnera akuersaaruminaatsikkini, tassamigooq tunngavilersuutai tassaasut allaffimmi igalaavata aserorneqarnera qitornaasalu qinngasaarneqartarnerat tunngavilersuutigiarsarissallugit illuatungeqarmata. Niels Qujaukitsup oqarnera naapertorlugu borgmesterip allaffiata igalaavata aserorneqarnera takornartaanngilluinnarsimavoq 1980-kkunnili borgmesteriusartut allat aamma tamanna misigisareermammassuk. Taamatuttaaq namminneq kajumissaarutigisimagaluaritsik qitornai ajortumik pineqartarsimappata tamanna politiinut saaffiginnissutigissagaa.
-Illit borgmesteriusuuguit taamarujussuarlu ajornartorsiutinik nammataqarlutit, meeqqatit qinngasaarneqartarlutik igalaarlu aserorneqartarluni, qanoq pissagaluarpit?
-Soorunami ingerlaannartumik politiinut nalunaarutigissagaluarpakka, akivoq.
-Ilissi kommunalbestyrelsemi qinikkatut issiavusi, ilissi aamma tamanna nukittorsaaqataaffigisinnaannginnassiuk?
-2003-imili piumasarisimagaluaripput kommunep iluani aningaasartuutit pillugit misissueqqissaartoqassasoq, oqarpoq.
Niels Qujaukitsup aamma Atorfillit Kattuffiata siulittaasuata akuliunnera illuatungilerpaa, oqarluni taanna Qaanaami pissutsinik sianigisaqarani oqalunnerarlugu. Taamalu oqaaseq piniarliiniaqarnerarlugu oqarnera akuerineqarsinnaanngitsoq, tassamigooq piniarliiniat toqoraasarmata namminnerlu taamatut taaneqarnertik iluarinngilluinnaritsik.
