Naartuersissinnaatitaaneq Kansasimi taasissutigineqartoq

Naartuersissinnaanermut pisinnaatitaaffeqarnissaq USA-mi naalagaaffeeqqat ilaanni Kansasimi innuttaasunut taasisitsissutigineqassaaq.

USA-mi 1973-imi eqqartuussinermi inernerusoq aallaavigalugu naartuersissinnaanermut pisinnaatitaaffik taamanerniilli ukioq manna juunimi USA-mi eqqartuussiviit qullersaata atorunnaarsitsinissaata tungaanut atuussimavoq.

Tassa USA-mi eqqartuussiviit qullersaanni siunertat allanngortinneqarnerisa kingunerisaannik naalagaaffeeqqat ataasiakkaat naartuersissinnaatitaanerup atuutiinnarnissaa atorunnaarsinneqarnissaaluunniit pillugu namminneq aalajangiisinnaatitaalerput.

AAMMA ATUARUK USA-p kongressiani ilaasortani 17-it akerliunermi tigusaasut

Naalagaaffeeqqamilu Kansasimi innuttaasut naartuersissinnaanitaaneq atuutiinnassanersoq taasinikkut maanna tassa aalajangertussanngorpaat.

Kansasimi sapaatit akunnerisa 22-ssaat tikillugu naartuersissinnaatitaaneq atuuttoq, tassani eqqartuussiviit qullersaanni 2019-imi aalajangerneqarnikuuvoq. Tamannalu atuutiinnassanersoq Kansasimiut ullumi aalajangertussaassavaat.

Kansasimiut naartuersissinnaatitaamut pisinnaatitaaffik atuutinnaasanersoq taasissutigereerpassuk, USA-mi naalagaaffeeqqat allat soorlu California aamma Kentucky ukiaru novembarimi tulliullutik taasititsiffiussapput.