"Borgen" unnugu takuneqartussaq nunatsinnut tunngassuteqassaaq
Unnugulu immikkoortoq aallakaatinneqartussaq Nunatsinni isiginnaartartunit soqutigineqassaqqooqaaq, tassami kalaallit arlallit, Angunnguaq Larsen filmimi "Nuummioq"-mi inuttaasoq Chilly Friday-ikkunnilu guitarertartoq Nuummiullu arlallit takuneqarsinnaassapput. Immikkoortormi unnugu aallakaatinneqartussaq ilaatigut Nunatsinnut attuumassuteqarpoq.
TV-kkut isiginnaagassiamik allattut pingaarnersaata Adam Pricep susoqarnissaa oqaatigiumanngilaa. Taamaattorli KNR-imut oqaatigaa, immikkoortumi Danmarkip Kalaallillu Nunaata akornanni sakkortuumik pisoqassasoq. Kisianni Kalaallit Nunaat sooruna samminiarneqartoq:
- Qallunaarpassuit allat assigalugit isumaqarpunga Kalaallit Nunaat kajungernartuusoq. Tassami Kalaallit Nunaata oqaluttuassartaa soqutiginarluinnartuuvoq, aammami Danmarkip nunasiaateqarnerata ajortuni ajunngitsunilu oqaluttuassartaata ilagaa. Taamaattumillu misigissutsinik sakkortuunik ilaqarluni. Soorlu tamanna pisimasuni assigiinngitsuni naammattoortaripput. Assersuutigalu meeqqat pinngitsaalisaallutik Danmarkimukartitaasut, aamma Avanersuarmi pisimasut Danmarkip Kalaallit Nunaatalu akornanni itisuunik ikiliisimapput.
Misigissutsillu sakkortuut isiginnaagassiarissallugit pitsaasuupput. Taamaattumik Borgenimi tamakkuninnga isiginnaagassiorniarsaraagut, Adam Price oqarpoq.
Taassuma tv-kkut isiginnaartartut neriorsorpai, unnugu immikkoortoq aallakaatinneqartussaq naalakkersuinikkut sakkortuumik pisoqarfiussasoq, pakatsisoqarnavianngitsorlu.
- Borgenimi immikkortuni maannamut takoriikkatsinnit, immikkoortoq unnugu takutinneqartussaq allaalaarpoq. Tassami unnugu ministeriuneqarfimmut pivugut suliassallu angisuut tikillugit. Suliassarlu ministeriunermut suliassanngortoq, matumani pineqartoq nukinginnartuuvoq, nunanut allanut isumannaatsuunissamullu tunngassuteqarluni. Tamatumanilu Danmarkip Kalaallit Nunaatalu akornanni pissutsit kalluarneqartussaallutik, Adam Price oqarpoq.
Tassa tv-kkut aallakaatitassiami Borgenimi immikkoortut sisamaat unnugu arfineq pingasunut aallartissaaq.
Angunnguaq Larsen Naalakkersuisunut siulittaasuusaarpoq. Angunnguaq Larsen ilaatigut filmimi "Nuummioq"-mi pingaarnerit ilaannik inuttaaffeqarpoq aamma nipilersoqatigiinni Chilly Friday-ikkunni guitarertuuvoq. Angunnguaq Larsenip saniatigut Nuummi najugallit arlallit aallaatitassiami takuneqarsinnaassapput.
