Blok P'p nivattaassuaq uppiffigaa

Ullumikkut nalunaaqutaq qulip qeqqa Blok P sinnera persuarsiorfiusumik uppisinneqartussaagaluarpoq.

Nalunaaqutarli arfineq pingasut qaangilaara isuani iigaq upperiasaarpoq, taamalu pisoqarnerani nivattaassuaq uppiffigalugu.

Radioaviisimi suleqaterput oqaluttuarpoq ajutoorfiusumik politiit, ambullancet qatserisartullu ikiuuttut qulingiluanngulerneranilu qammakut nivattaassuarmiit peerniarneqarput.

Iigaq Brugsenimut sammisoq nalunaaqutaq arfineq pingasut qaangilaaraa nivattaassuarmut uppippoq nivattaasuullu aquttarfia ammut naqillugu.

Qulingiluap missaani nivattaassuup aquttarfia tunginik qaqortunik asserneqarpoq annaassiniartartut sulineranni. Kingornali paasinarsivoq angut uppiffigitittoq tupinnaannartumik annassimasoq.

Qujanartumik angut uppiffigitittoq ikiorniarneqarnermini qaatusimavoq. Angut suleqataa ajutoorfimmi najuuttoq tuparujussuarsimanini pissutigalugu Dronning Ingridip napparsimmavissuanut unitsinneqartoq Inimi attaveqarnermut pisortaq Else Løvstrøm ilisimatitsivoq.

Ullaap tungaa politiit qatserisartullu qammakut piiarlugit ulappummata oqaaseqartissinnaasimanngilagut.

Inissiarsuup isaternera persuarsiorfiusumik qulip qeqqa nalliussineqartussaagaluarpoq politikkerit aammalu INI-meersut peqataaffigisaannik. Kisianni allatorluinnaq pisoqarpoq nivattaassuup uppisitsinissamut piareersarnerani. Naggataamik uppisitsinissamut iigarsuaq kiserngorunneqarsimagaluarpoq.

Ullup qeqqaanerani radioaviisimi takunnittup oqaluttuaa tusarneqarsinanavoq. Blok P-p eqqaa maanna inuppassuarnit ussngarfiusoq assersorneqarpoq ajutoorfiusup misissorneqarnerani.