Blok P: Sullissivinnik Nakkutilliisoqarfik isornartorsiuisoq
Suliffeqarfik Kingo Karlsen A/S Blok P-ip isaterneqarneranut akisussaasuuvoq, Sullivinnik Nakkutiliisoqarfimmi immikkoortortami pisortaq Jesper Labansen oqarpoq.
Nakkutilliisoqarfiullu isornartorsiutai imatut nassuiarpai:
-Isaterinermi isumannaallisaanermi pisariaqartinneqartut pilersaarusiorneqarsimannginnerat pillugu suliffeqarfik isaterinermik akisussaasuusoq unnerluutigisassanngortinneqassaaq, Jesper Labansen oqarpoq.
Isaterneqartup uppissinnaaneranik isumannaallisaanermik pisariaqartinneqartut qulakkeerneqarsimanngillat, uani isarterinermik sulisup isumannaatsumik sulinissaa qulakkeerneqarsimanani, Jesper Labansen oqarpoq.
Sullivinnik nakkutilliisoqarfiup isornartorsiunera suliffeqarfiup Kingo Karlsen-ip A/s-imit isumaqatigineqanngilaq, blokkip isaternerani suliat siulliit pilersaarutit malillugit isaterneqarput, taamaattorli blok-ip isuata uppitinneqarnissaannut ajortoortoqarpoq, Jørgen Bak oqarpoq. Taassuma aamma ilanngullugu oqaatigaa Blok P-ip piiarneqarnissaanut pilersaarusiorneqarsimasoq.
Sullivinnik Nakkutiliisoqarfiup isornartorsiunera suliffeqarfimmit Kingo Karlsen-imit ilungersunartutut tiguneqarpoq.
Blok P-ip isua uppitinniarneqalermat ajorluinnartumik pisoqarpoq, suliffeqarfiup Kingo Karlsen A/S-ip tunisassiornermik pisortaata Jørgen Bak-ip nassuerutigaa:
-Isaterineq tamakkiisumik pilersaarusiorneqarsimanngilaq taamaattumik ajutoortoqarpoq tamannalu maannakkut misissulerparput, Jørgen Bak oqarpoq.
Ajutoortoqarmat qanorpiaq pisoqarsimaneranik, Sullivinnik Nakkutilliisoqarfup suliffeqarfiullu Kingo Karlsen A/S-ip erseqqissumik oqaatigisinnaanngilaat, Jørgen Bak-illu teknikkimut tunngasortai imatut nassuiarniarsarai.
- Blok p-ip isaterneqarnerani majuartarfiit piiarneqartut siulliit ajunngitsumik isaterneqarput, majuartarfiit kingulliit iigarlu isaterneqalermata qajannarpallaarsimanngillat, taakkua uppinnginnissaannut qarmasissiat uppinnaveeqqutitut atorneqartut assigiimmik annertussusilerlugit inissinneqarsimanngillat Jørgen Bak oqarpoq.
Suliaq eqqartuussisunut tunniunneqassanersoq Sullivinnik Nakkutiliisoqarfimmi pisortap Jesper Labansen-ip akisinnaannagu oqarpoq.
-Suliamut tunngassuteqartumut paasissutissat kingulliit inisseriarpara susoqassanersoq aalajangiiffigineqarumaarpoq.Politiit misissuinerannit takussutissat nuunnerat tigoriarutsigu tusaatissatut tigussavarput, tassanngaanniillu suliaq sumut ingerlateqqinneqassanersoq aalajangiiffigalutigu, Jesper Labansen, Sullivinnik Nakkutiliisoqarfiup immikoortortaqarfiani pisortaq oqarpoq.
