Blok P qaammat ataaseq qaangiuppat ingutserneqalissaaq

- Ingutseriffiusumi piaakkat amerlatikkaangata, taakku siaruarnissaat pinaveersaartinneqartassaaq. Najugaqarfissuaq sanaartorneqarmat atortut sanaartuutigineqarsimasut avatangiisinut peqqissutsimullu navianaateqartut containerinut parnaartakkanut inissinneqartassapput, INI Byggeteknik A/S, ingutserinissamut nakkutilliisussaq, ingutserinerup nalaani innuttaasut navialeqqunagit, ingutseriumaartussanut piumasaqaateqarluni ilaatigut taama erseqqissaavoq.

Blok P-ip betonertaanik misissuisoqarmat paasinarsivoq, betonertaata ilarujussuani akuutissamik navianartumik PCB-mik akoqartoq. Olafur P. Nielsen, Ineqarnermut, Attaveqarnermut Angallannermullu Naalakkersuisoqarfimmi pisortaq siorna oqarpoq navianartup piiarnerinnaanut 15 millioner koruunit angullugit aningaasaliisoqartariaqassasoq.

-  Ingutsilerinnginnermi pilersaarusiortoqassaaq piiakkat, ingutserinermilu pujoralak avatangiisinut pitsaaliorneqassalluni. Ingutsigaq masatsertuaannartariaqarsinnaassaaq, soorlu aamma anorip sammivia aalajangersimasoq nalaassimaaleraangat ingutserineq unitsinneqartariaqartassalluni, INI Byggeteknik A/S suliarinniuttussarsiuussinermi ilaatigut erseqqissaavoq.

Suliarinnittussarsiussineq ullumi nalunaaqutaq marlunut pissaaq.