Blok P-p isaterneqarnissaa qallivoq

Nunatta oqaluttuassartaa qaammat ataaseq qaangiuppat martsimi naggaserneqassaaq. Maaji qaammat 1965-mi Blok P iserterfigineqarmat nunatsinni inissiarsuit takinerpaartaatut tusaamasaalerpoq, sivitsunngitsoq ernguttarfissuartut, toqutsinernut meeqqanillu atornerluisarnernut tusaamasaalerluni.
Allattoq Per Andersen
januaarip 27-at 2012 12:26

Qaammat ataaseq qaangiuppat martsi qaammat, Nuummi innuttaasut usisaatinit biilersuarnit, kiisalu kraninut blokinit aserorterutinit itersagaalissapput. Taamaattoqalerpat naluneqassanngilaq nunatta oqaluttuarsartaasa ilaannut ilisimannittuussallutik.

Kiap upernaaq 1965 eqqaamanngilaa, piffissaq siparni atorlugu imertartarneq inissiarsuup Blok P-ip atulerneratigut Nuummiorpassuarnit oqaluttuaannanngormat. Inissiarsuarmut nutaaliaalluinnartumutut kuuginnartumik imilimmut nuullutik, taamaalillutik sukkulluunniit imeq kialaartoq atorlugu uffarsinnaalerlutik.

- Blok P-ip isaternissaa pillugu pilersaarut malillugu martsip qiteqqunnerata nalaani 2012-mi aallartinneqassaaq, naatsorsuutaavorlu ukiup affaata missaanik sivisussuseqassasoq, Jesper Johannesen INIp sanaartornermut teknikkeqarfiani pisortaq KNR-imut oqarpoq.

Inissiarsuup qammai betonimit sanaajusut tonsilikkaat piiaarneqassapput. Inissiarsuullu ungasinngisaanniipput meeqqerivik, atuarfik inissiallu allat.

-Inissiarsuaq tamarmi assiaqutserlugu inunnut isumannaarneqassaaq. Inissiap eqqaamiui tamarluinnarmik nipiliortoqartarsinnaanera pujoralaqartarsinnaaneranillu ilisimatinneqassapput, Jesper Johannesen oqarpoq.

Isaterinissamut suli suliarinnittussaq pillugu aalajangertoqanngimmat, maannamut isaterinissaq qanorpiaq akeqassanersoq suli oqaatigineqarsinnaanngikkallarpoq.