Blok P-imi toqutsineq suli misissuiffigineqarpoq
Angut 62-inik ukiulik qanoq toqutaasimanersoq toqutsinermullu suna pissutaasimanersoq pillugit politiit suli oqaaseqarusunngillat.
- Suliami suli misissueqqissaartoqarpoq, tamannalu tunngavigalugu annerusumik oqaaseqarusunngilanga, Vicepolitimester Morten Nielsen oqarpoq.
Angut 40-ikkunni ukiulik toqutsisutut pasineqarluni novembarip arfernani tigummigallagassanngortinneqarpoq.
Danmarkimi Politiit pinerluttoqarsimatillugu misissueqqissaartartui suliamut tunngatillugu aamma suleqataapput. Danmarkimi toqusimasut timaannik misissuisartoq angutip 62-inik ukiullip timaanik novembarimi misissuivoq.
Misissuinerulli inerneri pillugit annerusumik saqqummiusserusuttoqanngilaq.
- Oqareernittuut, politiit suli misissueqqissaarput, tamannalu tunngavigalugu annerusumik oqaaseqarusunngilanga, Vicepolitimester Morten Nielsen oqarpoq erseqqissaallunilu politiit sapinngisartik tamaat atorlugu suliamik misissueqqissaartut.
