Blok 17-imi toqutsineq pillugu eqqartuussinerup ulluisa aappaat: Toqutaasoq qajassuuteqquvoq
26-nik ukiullip siorna juunip 20-ani toqutaaneranut atatillugu toqutsisutut unnerluussaasup 20-nik ukiullip killisiornerqarnera ullaaq aallartippoq, toqutsinermut atatillugu eqqartuussineq Nuummi eqqartuussisoqarfimmi Sermersuumi ullup aappaani.
Unnerluutigineqartoq Eqqartuussisoqarfiup Sermersuup killisiusarfianut ingippoq, tusarnaartut tunullugit, eqqartuussisullu saallugit siorna pisut oqaluttuaralugit. Unnerluussisumit, illersuisumit taamatullu eqqartuussisut aqutsisuanit killisiorneqarpoq.
Toqutsineq pillugu nassuiaateqarnermini toqutsinerup amiilaarnassusia misigissuseqarfigerpasinngilaa.
Kisianni unnerluussisup angutip 20-nik ukiullip meeraanermini aqqusaarsimasai misigisimasaallu pillugit apersuilermat angut 20-nik ukiulik oqaluttuarsinnaajunnaarpoq illersuisualu eqqartuussinerup unitsikkallarneqarnissaanik piumasaqarluni.
Unnerluutigineqartup nassuiaateqarnermini oqaluttuaraa Blok 17-imi ullaarnganit aallartittumik erngutilersimallutik.
Piffissap ilaani toqutaasorlu politikki pillugu assortuutilerput.
Assortuunnermi tassani angut 20-nik ukiulik sakkortuumik kamatsinneqarpoq, nammineq oqarnera malillugu kamannini aqussinaajunnaarlugu. Politikki pillugu nammineq ingasattajaartumik kommunistit eqqarsartariaasiannik illersuisuuvoq toqutaasorlu taassumalu ilaqutai facistit politikkiannik illersuisuunerarlugit.
Toqutsineq sioqqullugu pisut ataasiakkat arlaqartut eqqaamasinnaanagit angut 20-nik ukiulik nassuiaateqarnermini oqarpoq. Taamaattorli Blok 17-ip qaavani pisut tamaasa eqqaamavai.
Angut toqutaasoq Blok 17-ip qaavanut qimaammat, angutip 20-nik ukiullip malippaa tassanilu sakkortuumik persuttarlugu ilisimajunnarnissaata tungaanut. Blok 17-ip qaavani angutip toqutsisutut unnerluussaasup aalajangerpaa, angut 26-nik ukiulik Blok 17-ip qaavanit avammut iginniarlugu.
Siullermik Blok 17-ip kujammut sammisuanut nakkartinniarlugu aalajangeraluarpoq, meeqqalli pinnguarmata taakkua ajortumik takusaqassanngimmata, Blok 17-ip avannamut sammisuanut nakkartinniarlugu aalajangerpoq, nakkartillugulu.
Angut 26-nik ukiulik Blok 17-ip altaniata ungaluanut tuppoq angutillu unnerluussasup ornippaa tassaniinerminnilu angutip 20-nik ukiullip 26-nik ukiulik aperivaa uumaannarusunnersoq toqorusunnersorluunniit, unnerluutigineqartup nassuiaateqarnera malillugu, angut 26-nik ukiulik uumaannarusullluni niaqquminik anngaavoq, tamannali unnerluussaasup ajoraluartumik tapersersunngilaa, altanimiillu iperarpaa, 26-nillu ukiulik nakkarpoq.
Tusarnaartuulluni tusakkat sakkortupput, eqqartuussivimmilu tusarnaartut ikittuinnaasut nipaqanngillat.
Unnerluussisup unnerluussaasoq piffissap ilaani aperivaa toqutsineq sioqqullugu toqutsinerlu pillugu misigissutsimigut qanoq innersoq, taannalu oqaluttuarpoq, inummik allamik aqutsisinnaassutsini takkussimasoq.
Ullup qeqqata siorna killisiuisoqarnerani angutip 20-nik ukiulllip meeranermini aqqusaarsimasani sivikitsuinnarmik eqqaavai, taakkuli pillugit oqaluttuaqqissinaannginnami eqqartuussineq untisinneqarallarpoq, tassuunatigut erserpoq meeraanermini imaannaanngitsunik atuagaqarsimasoq, anaanamit paarineqarsinnaannginneq kingornalu Nuummi meeqqanut ulloq unnuarlu angerlarsimaffinni assigiinngitsuni inissinneqartarsimalluni.
