Blok 17-imi toqutsineq pillugu eqqartuussineq naammasineqalerpoq
Piffissami killiligaanngitsumi Danmark-imi tarnimikkut napparsimasut katsorsartarfiannut inissinneqarnissaa imaluunniit sivisunerpaamik ukiuni qulini nunatsinni pineqaatissinneqarsimasunut inissiiarfimmut inissinneqarnissaanik pineqaatissiinissaq. Tamanna tassaavoq Blok 17-imi toqutsineq pillugu eqqartuussinermi isumaqatigiinngissutaasoq.
maajip 31-at 2013 13:02
Eqqartuussineq ullumi naggataarutaasumik ingerlanneqarpoq. Unnerluussisussaatitaasoq illersuisullu suliamik naliliinitik ullumi saqqummiuppaat.
20-inik ukiullip toqutsisimasutut unnerluussaasup katsorsagassanngorlugu piffissami killiligaanngitsumi Danmarkimi pineqaatissinneqarnissaanik piumasaraa. Tarminikkut napparsimasunik katsorsaavimmi Risskovimiittumi inissinneqartussanngorlugu.
Toqutsinerup peqqarniitsupilussuarmik pisimanera tunngavilersuutigaa.
Toqutsisutut unnerluutigineqartup illersuisuata unnerluussaasup inuusunnera kiisalu nassuersimanera pingaaruteqartut oqaatigai. Taamaammat Nunatsinni pinerluuteqarsimasunut inissiisarfimmi ukiuni 8-10-ni pineqaatissinneqartariaqarlugu tunngavilersuivoq.
