Blok 14-imi toqutsineq ullumi aalajangiiffigineqassaaq
Angutit pineqartut marluk toqumik kingunilimmik nakuusersimasutut unnerluutigineqarput.
Unnerluussisut piumasaqaatitik, tassa angutip 42-nik ukiullip ukiuni pingasuni 37-inillu ukiullip ukiup aappaata affaani pineqaatissinneqarsimasunut inissiisarfimmiittussanngortinneqarnissaat aalajangiusimavaat.
Nuup Eqqartuussiviani qaammammi kingullermi 42-nik ukiulik, ukiup aappaata affaani pineqaatissinneqarsimasunut inissiisarfimmiittussanngorlugu eqqaartuunneqarpoq, 37-nillu ukiulik pinngitsuutitaalluni. 42-nik ukiullip pineqaatissinneqarnini Nunatta Eqqartuussivianut suliassanngorteqqippaa aamma 37-nik ukiullip pinngitsuutitaanera unnerluussisunit suliassanngorteqqinneqarluni. Tassalu suliassanngortitseqqinnerit taakku marluk Nunatta Eqqartuussivianit ullumi aalajangiiffigineqassapput.
Unnerluutigineqartut marluusut, 34-nik ukiullip aallaaneqarnissaa isumaqatigiissutigereersimaneraat, unnerluussisunit tallimanngormat nalorninartoqartinneqalerpoq. Unnerluutigineqartut aallaaneqartumit marloriarlutik orninneqartareerlutik, toqutaanissaminnillu sioorasaarneqarnermik saniatigut saassuneqartareerlutik, sooq politiinut saaffiginnissimannginnersut, unnerluussisut aamma apeqquserpaat.
42-nik ukiullip aallaannittuunini nassuerutigereerpaa. 37-inilli ukiullip peqataasimanera nalornissutigineqarpoq.
Nunatta Eqqartuussiviata ullumi ullup qeqqata missaani aalajangiinissaa naatsorsuutigineqarpoq.