Blair tusagassiutinik saassussivoq
Tusagassiuutit uumasutut qaasuttutut innimigisaqanngitsutut ipput, ataatsimoorlutik piniartarput uissuumminartussarsiorlutik piviusunillu allanngortiterisarlutik. Taama isumaqarpoq tuluit ministeriunerat tunuartussanngortoq Tony Blair, ippassaq unnukkut oqalugiartilluni tusagassiuutinik saassussinermini. Kisianni Blairip tuluit naalakkersuinermik ingerlatsineranni naalakkersuinikkut periaatsimik nutaamik eqqussisutut taama pissusilersortarnermut pisooqataasoq, ilisimatooq Mads Qvortrup tuluit naalakkersuisuinut siunnersortaasimasoq oqarpoq.
Tusagassiorfiit akeqqersimaartuupput qasuffeqanngitsut, naalakkersuinermillu suliaqartut Tuluit Nunaannut eqqortumik aalajangiisinnaanissaannut akornusersuisartut.
- Ittuujuitsuupput uuminartut, inunnik tusaamaneqarnerinillu sequtserisartut, Tony Blair oqarpoq.
Soormitaavaana Tuluit Nunaata ministeriunera tunuartussanngortoq taama oqaluttoq?
Mads Qvortrup, naalagaaffiit pissusiinik ilisimatooq, ima oqarpoq:
- Taamatut oqalunnini iluaqutiginngilaa, taamaallaat aviisit kusanaatsumik qulequtsersuillutik eqqartorpaat. Allaat aviisit Tony Blairimut inussiarnisaartaraluartut pitsaanngitsumik eqqartorpaat. Tassa tusagassiuutinik saassussinera eqqarsaatigilluagaanngilaq.
Tamatuma peqatigisaanik qinersisartunik isumasiuinerit oqaatigaat Blair nammineerluni taama pissuseqarfigineqarnerminut pisuusoq.
Aamma Blairip isertuutinngilaa ukiorpassuit illuatungiliuttooreerlutik ministeriuninngornermini nammineq aamma partiimi Labour-ip tusagassiorfinnut qaninniarnissaq ukioq siulleq pisariaqartissimagitsik.
- Tamanna ukiut 18-it illuatungiliuttooreerluni pissaaneqalernissamut aqqutissatuaasimavoq, Blair oqarpoq.
Kisianni Mads Qvortrup-ip Blairip naammagittaalliornera eqqumiitsutut peqqusersusaarnertullu taavaa.
Aningaasaqarnermut ministerip Gordon Brownip Blair sapaatip akunneri marluk qaangiuppata taarsissavaa. Taassumalu tusagassiorfiit imminut nuannarinninnersut nuannarinninnginersulluunniit apeqqutaatippallaanngilaa.
