Blair tunualerpoq Brownilu ministeriuninngussaaq

Tuluit Nunaata ministeriunera Tony Blair ukiuni qulini nunami premierministerioreerluni ullumi tunuartussanngorpoq. Taamaalilluni Tuluit Nunaanni ministeriuninngussaaq maanna aningaasaqarnermut ministeriusoq Gordon Brown.

Tony Blair parlamentimi ilaasortanit naggammik tassuugu nunatta nalunaaqutaa malillugu qulingiluanut apeqqarissaarfigineqassaaq. Taama pereeruni dronning Elizabethimukassaaq, sooraarniumminik tunniussiartorluni. Taama pisoqareerpat Gordon Brown Dronningimukassaaq naalakkersuisunngortitsinissaanik qinnuigineqassalluni.

Blair ministeriunerit illorsuarisartagaannut Downing Streetimiittumukassaaq sulisuminut qimalikkaminut qujajartorluni.

Tuluit aviisii Blairip tunuarneranut atatillugu allaaserisaat imaaginnavipput, ilaasa Blair politikeritut politikkimi ileqqunik allanngortitsisimaneraraat, ilaasa Blairip politikeritut pikkorissusersua atorluarneqanngissorigaat.

Tuluit Nunaanni ukiuni 18-ini atasuinnarmik konservativet naalakkersuisooreersut Blair ministeriuninngorpoq, nunamilu partiiat siuttuujuarsimavoq 2003-p tungaanut, taamani Irakimut Tuluit Nunaata sorsoqataanera innuttaasunit assuarineqaleruttortoq.

Ministeriuninngortussaq Gordon Brown Blair peqatigalugu nunamik ingerlatsisimasoq, pissutsinik nutarsaaniarluni ilimasaarereerpoq, taamaattumik ullumi aqaguluunniit naalakkersuisuutitat nikingaatsiarnissaat ilimagineqalereerpoq.